Իտալիայի նախկին վարչապետ Սիլվիո Բեռլուսկոնին համաձայնեցրել է նախկին կնոջը՝ Վերոնիկ Լարիոյին, ալիմենտ վճարելու պայմանները: Այս մասին հայտնում է Corriere della Sera-ն:
Բեռլուսկոնին նրան կվճարի օրական շուրջ 100 հազար եվրո (ամսական՝ 3 մլն, տարեկան՝ 36 մլն եվրո): Համաձայն օրենքի՝ կինը ամուսնալուծությունից հետո կարող է ստանալ այնքան գումար, որքան անհրաժեշտ է ամուսնության ժամանակ ունեցած կենսամակարդակը պահպանելու համար:
Գումարի այդ չափը պայմանավորված է նաև այն փաստով, որ Լարիոն չի հավակնում անշարժ գույքի. Բեռլուսկոնիին է մնում առանձնատունը, որը գնահատվում է 78 մլն եվրո:
Վերոնիկա Լարիոն ափսոսանք է հայտնել, որ ստիպված է հեռանալ առանձնատնից: Ամուսիններն այնտեղ բնակվել են 20 տարի, դաստիարակել 3 երեխայի:Նրանք ամուսնացած են եղել 30 տարի:
Վերոնիկան ամուսնալուծության վերաբերյալ փաստաթղթերը դատարան է ներկայացրել 2009 թվականին՝ Բեռլուսկոնիին մեղադրելով ամուսնական դավաճանության մեջ:
Նախկին վարչապետը մեղադրվում է անչափահասների հետ սեռական կապեր ունենալու մեջ: Դեկտեմբերի կեսերին էլ նա հայտարարել է իրենից 49 տարով երիտասարդ հարսնացու ունենալու մասին:
