Ոչ իշխանական ուժերի երեկ տեղի ունեցած խորհրդարանական խորհրդակցությունից հետո ԲՀԿ-ական Նաիրա Զոհրաբյանը ասել է, որ քննարկվել է առաջիկա խորհրդարանական ռազմավարության հարցը, և չի բացառվում նաև բոյկոտի կիրառումը, սակայն առաջիկա քառօրյայի ընթացքում բոյկոտ չի լինի:
Այնուամենայնիվ, բոյկոտի գաղափարի հրապարակ նետումը հետաքրքրական է մի իրադարձության կոնտեքստում, որը սպասվում է առաջիկայում: Խոսքը վերաբերում է հայաստանյան խորհրդարանում Եվրասիական միությանը Հայաստանի անդամակցության պայմանագրի վավերացմանը, որը ստորագրվեց հոկտեմբերի 10-ին Մինսկում: Պայմանագիրը պետք է վավերացվի խորհրդարանում, իսկ ոչ իշխանական ուժերն, ըստ էության, այս կամ այն կերպ կողմ են արտահայտվել այս պայմանագրին, ԵՏՄ-ին Հայաստանի անդամակցությանը և այն հայտարարել են անշրջելի:
Ճիշտ է, Րաֆֆի Հովհաննիսյանն է կարծես թե դեմ արտահայտվել, սակայն սա էլ իր հերթին իրավիճակը հետաքրքրական է դարձնում խորհրդարանական վավերացումից առաջ, որովհետև քվեարկության ընթացքում ոչ իշխանական ուժերը չեն կարող միասնական քվեարկել: Եվ բնականաբար մնում է բոյկոտի տարբերակը: Սակայն, ընդհանուր առմամբ, այդ տարբերակի անհրաժեշտությունը բնականաբար «Ժառանգության» տարբեր դիրքորոշմամբ չէ, որ պայմանավորված է: Խնդիրը ավելի խորն է:
Ոչ իշխանական ուժերը կողմ են ԵՏՄ-ին, սակայն խուսափում են այս մասին ուղիղ հայտարարել: Բայց խորհրդարանական վավերացման գործընթացում խուսանավելը շատ դժվար կլինի, և արդեն հարկ կլինի հստակ դիրքորոշում արտահայտել Սերժ Սարգսյանի քայլի կապակցությամբ, Հայաստանի սուվերենությունը հանձնելու կապակցությամբ: Կողմ արտահայտվելը կնշանակի, ըստ էության, մեղսակցությունը պաշտոնապես ստանձնել, դեմ լինելը կնշանակի Ռուսաստանին, Պուտինին բարկացնել:
Եվ հենց այս նկատառումներով էլ, ըստ էության, քառյակը դիտարկում է խորհրդարանական աշխատանքների բոյկոտի տարբերակը, որովհետև զուտ այդ հարցի բոյկոտն էլ, ըստ էության, կարող էր վատ ընկալվել Ռուսաստանի կողմից, և ուրեմն կարիք կար առավել լայն բոյկոտի նախապատրաստման, համենայնդեպս, որպեսզի երբ ավելի լավ կամ հարմար որոշում չկայացվի, կիրառվի բոյկոտը, սակայն այնպես, որ տպավորություն չստեղծվի որ հենց տվյալ հարցն են բոյկոտում, այլ խորհրդարանական աշխատանքները ընդհանրապես:
Լուսանկարը՝ Photolure-ի
