Բնության վրա մարդու ազդեցությունը այնքան մեծ է դարձել, որ գիտնականները մեր դարաշրջանին նոր անվանում են մտածել: Նրանք այն «անտրոպոցեն» են անվանել, որը «մարդու դար» է նշանակում, հաղորդում է The Associated Press-ը:
Արդյունաբերության ազդեցությունը մեր մոլորակի, հատկապես կլիմայի վրա շատ գիտնականների դրդել է մեր դարաշրջանը «անտրոպոցեն» անվանել, որը նրանց կարծիքով առավել լավ է բնութագրում այն, թե որտեղ է գտնվում ժամանակակից մարդկությունը:
«Մենք փոփոխում ենք Երկիրը: Դրանում կասկած չկա, ես դա տեսել եմ տիեզերքից»,- հատարարել է տիեզերագնաց Ւոն Գրյունսֆելդը, ով այժմ NASA-ի գիտական աշխատակից է հանդիսանում: Նա ասում է, որ երբ ուղեծրից Երկրին է նայում, չի կարողանում մի տեղ գտնել, որտեղ մարդը չի թողել իր հետքը: Այդ պատճառով էլ նա համաձայն է մեր դարաշրջանի համար նոր անվանում կիրառելու հետ:
Օրերս Սմիթսոնի ինստիտուտում կայացել է «Կյանքը անտրոպոցենում» գիտական համաժողովը, իսկ Համագործակցության ամերիկյան ասոցացիան կազմակերպել է «Անտրոպոցենի քարացած բնաշխարհը» ցուցահանդեսը: Այս տարի «անտրոպոցենին» նվիրված ավելի քան 500 գիտական ուսումնասիրություններ են հրապարակվել:
Ավստրալացի գիտնական Ուիլլ Շտեֆանը հայտարարել է, որ «մարդու դար» ասելով հարկավոր է նկատի ունենալ ոչ միայն կլիմայական փոփոխությունները: Այն ներառում է նաև օզոնային շերտի բարակումը, անտառահատումները, օվկիանոսների աղտոտվածությունը և այլ գլոբալ խնդիրներ:
Որպեսզի «անտրոպոցեն» անվանումը պաշտոնական դառնա, այն պետք է հավանության արժանանա Երկրաբանական գիտությունների միջազգային միության կողմից:
