ՀՀ գլխավոր հարկադիր կատարողի տեղակալ , արդարադատության փոխգնդապետ Արմեն Հարությունյանը «Կատարողական վարույթի խնդիրների ավանդական և նորարարական լուծումները» խորագրով միջազգային 2-րդ գիտագործնական համաժողովի բոլոր մասնակիցներին Հայաստանի հարկադիր կատարման ծառայության և ՀՀ գլխավոր հարկադիր կատարող, արդարադատության գեներալ-մայոր Միհրան Պողոսյանի անունից հուշանվեր է հանձնել, որն իր մեջ մի քանի խորհուրդ է պարունակում: «Ծառայության և անձամբ գլխավոր հարկադիր կատարողի անունից պատիվ ունեմ ձեզ ներկայացնելու մի քանի խորհուրդ պարունակող հուշանվեր: Իհարկե, դուք այստեղ կտեսնեք 2-րդ միջազգային գիտագործնական համաժողովը վկայակոչող նշում՝ Ծաղկաձոր-2014, Հայաստան»,- նշեց նա:
Հարությունյանն ընդգծեց, որ այս հուշանվերն առանձնահատուկ է նրանով, որ մի երեսին պատկերված է հարկադիր կատարման ծառայության խորհրդանիշը, իսկ մյուս երեսին՝ Հայոց ցեղասպանության զոհերի հիշատակը հավերժացնող հուշահամալիրը. «Դուք այստեղ կարող եք տեսնել հայկական տառեր և այն մարդու պատկերը, ով հայոց գրերի հիմնադիրն է. դա եղել է 5-րդ դարում: Խնդրում եմ պահել այս նվերը՝ որպես հիշատակ կամ հուշ 2-րդ միջազգային գիտագործնական համաժողովից, Ծաղկաձորից, Հայաստանից և հայերից: Ինձ համար իրոք մեծ պատիվ է այն ձեզ հանձնել»,- ասել է Արմեն Հարությունյանը:
