Սիրիացի ապստամբները հայտարարել են Թուրքիայի հետ սահմանակից Հարեմ քաղաքը զավթելու մասին: Քաղաքը, որտեղ մինչ հակամարտության սկսվելը շուրջ 20 հազար մարդ էր բնակվում, գտնվում է հյուսիսային Իդլիբ նահանգում: Քաղաքի գրավումն ընդարձակել է հակակառավարական ուժերի կողմից վերահսկվող, առանց այդ էլ՝ լայն գոտին: Այս մասին հայտնում է Associated Press-ը:
Լոնդոնում տեղակայված Մարդու իրավունքների պաշտպանության մոնիտորինգի ներկայացուցիչ Մոհամմեդ Կանանը հաստատել է այդ տեղեկությունը և հավելել, որ կառավարական ուժերի վերջին պատվարը եղել է խաչակիրների ժամանակների ամրոցը, որը նրանք վերածել էին կրակային համակարգով բաստիոնի: Մարտերի ավարտից հետո ապստամբները հայտարարել են առնվազն 30 զինվոր պատանդ վերցնելու մասին:
«Հարեմը շատ կարևոր թիրախ էր, քանի որ նրա բնակիչները մինչ օրս հավատարիմ էին մնում իշխող ռեժիմին»,- ասել է մինտորինգի կենտրոնի ղեկավարը:
Նշենք, որ ապստամբների ազդեցության գոտում է նաև Հալեպ նահանգի՝Թուրքիայի հետ սահմանակից մասը: Ապստամբների խոսքով՝ իրենց վերահսկողության տակ է գտնվում առնվազն 3 սահմանային անցում:
