Շիրակի մարզի ընդհանուր իրավասության դատարանում Մարտին Սարոյանի նախագահությամբ ավարտվել է Կարեն Կարախանյանի գործի դատական քննությունը:
Ըստ դատական ակտի՝ 2014 թվականի փետրվարի 12-ին, ժամը 18-ն անց 30-ի սահմաններում 30-ամյա Կարենը հանդիպել է իր ընկերներ Ռաֆիկին, Արտյոմին ու Գոռին: Որոշել են գնալ բիլյարդ խաղալու: Գնացել են Գյումրիի Պ. Սևակի փողոցում գործող բիլյարդի ակումբ:
Պատվիրել են ակումբի «ՎԻՊ» սրահը, սկսել են բիլյարդ խաղալ:
Խաղալու ընթացքում Կարենն ու ընկերները խոսել են բարձրաձայն, հայհոյել են: Սրահ է մտել անվտանգության աշխատող Հրաչյան և զգուշացրել է, որ ցածր խոսեն ու չհայհոյեն:
Երիտասարդները հանդարտվել են:
Կես ժամ անց նրանք նորից սկսել են հայհոյել ու գոռգոռալ:
Անվտանգության նույն աշխատողը կրկին մտել է սրահ, զգուշացրել է հայհոյողներին, բայց նրանք վրդովվել են: Կարենը վիճաբանել է Հրաչյայի հետ:
Քաշքշուկ է առաջացել:
Անվտանգության աշխատողը պահանջել է, որ տղաները հեռանան ակումբից: Նրանք բոլորը դուրս են եկել ընդհանուր սրահ, քայլել են դեպի ակումբի մուտքի դուռը: Անվտանգության աշխատողը քայլել է առջևից, մյուսները՝ հետևից:
Հասնելով դռանը՝ Կարեն Կարախանյանը ձեռքում պահած բիլյարդի խաղագնդակով հարվածել է անվտանգության աշխատողի գլխին:
Հրաչյան ընկել է , գլուխը հարվածել է հատակին և ուշագնաց է եղել:
Ըստ մեղադրանքի՝ Կարեն Կարախանյանի գործողություններով Հրաչյա Նազարեթյանի առողջությանն անզգուշությամբ պատճառվել է միջին ծանրության վնաս՝ առողջության տևական քայքայումով:
Կարեն Կարախանյանը մեղադրվել է ՀՀ քրեական օրենսգրքի 121 հոդվածի 1-ին մասով:
Ընդհանուր իրավասության դատարանում Կարեն Կարախանյանն իրեն մեղավոր է ճանաչել մասնակիորեն:
Նա ասել է, թե ակումբի ընդհանուր սրահում Հրաչյան արագ քայլերով իր կողմն է եկել, ինքը մտածել է, որ նա ցանկանում է խփել իրեն, ու բռունցքով մեկ հարված է հասցրել նրա կրծքավանդակին:
Հրաչյան կորցրել է հավասարակշռություն ու ընկել է: Գլուխը հարվածել է հատակին:
Ինքն ու Հրաչյան հետո խոսել ու հաշտվել են: Ինքը բիլյարդի գնդակով չի հարվածել: Զղջում է կատարվածի համար, պատրաստ է հատուցել տուժողին պատճառված նյութական վնասը:
Տուժողը պնդել է, որ Կարենն իրեն հարվածել է բիլյարդի խաղագնդակով: Երբ ինքն ուշքի է եկել, Կարենն ու ընկերները ակումբում չեն եղել: Ինքը չի հաշտվել Կարեն Կարախանյանի հետ, ցանկանում է, որ նա ենթարկվի քրեական պատասխանատվության: Դեպքի պատճառով ինքը բուժումներ է ստացել, կրել շուրջ 300 հազար դրամի նյութական վնաս: Տուժողը խնդրել է ամբաստանյալից բռնագանձել նշված գումարը:
Դատաբժշկական փորձաքննության եզրակացությամբ բացառվել է, որ տուժողի գլխի շրջանի վնասվածքներն առաջանային բռունցքով նրա կրծքավանդակին հարվածելու, տուժողի ընկնելու հետևանքով:
Ընդհանուր իրավասության դատարանը հաստատված է գնահատել Կարեն Կարախանյանի մեղքը մեղսագրված արարքում, նրան դատապարտել է 70 հազար դրամ տուգանքի: Ամբաստանյալ Կարախանյանից հօգուտ տուժողի կբռնագանձվի 300 հազար դրամ՝ որպես պատճառված վնասի հատուցում:
Իրեղեն ապացույց ճանաչված բիլյարդի գնդակը կվերադարձվի «ՎԻՊ» սրահի տնօրինությանը:
