«Ամերիաբանկ» ՓԲԸ-ն և Նիդերլանդների զարգացման ֆինանսական ընկերությունը` FMO-ն, այսօր աննախադեպ գործարք կնքեցին՝ ստորագրելով 20 միլիոն ԱՄՆ դելարի փոխարկելի ստորադաս փոխառության պայմանագիր: ՀՀ բանկային համակարգի պատմության մեջ առաջին անգամ է, որ հայկական բանկը փոխարկելի ստորադաս փոխառություն է ներգրավում միջազգային ֆինանսական կազմակերպությունից, ինչը Հայաստանի բանկային համակարգի համար միջազգային ներդրողների աճող վստահության խոսուն ապացույց է:
FMO-ի և «Ամերիաբանկ»-ի համագործակցությունը սկսվել է դեռ 2009թ., երբ շրջակա միջավայրի և սոցիալական ռիսկերի կառավարման համակարգի հաջող ներդրման շնորհիվ «Ամերիաբանկն» առաջին անգամ ստացել է տոկոսադրույքի իջեցում FMO-ից:
FMO-ն այսօր կնքեց այս գործարքը՝ բարձր գնահատելով «Ամերիաբանկ»-ի բացառիկ բաժնետիրական կառուցվածքը, կորպորատիվ կառավարման մակարդակը և շարունակաբար աճող ֆինանսական ցուցանիշները:
«Ամերիաբանկ»-ի գլխավոր տնօրեն Արտակ Հանեսյանը գործարքի ստորագրումից հետո նշեց, որ կապիտալի փոխարկվող այս երկարաժամկետ փոխառությունը կարող է էապես խթանել բանկի զարգացումը՝ նպաստելով վարկային պորտֆելի հետագա աճին: «Մենք շատ ուրախ ենք FMO-ի վստահությանը արժանանալու համար և հուսով ենք, որ մեր սերտ համագործակցությունը կշարունակվի տարիներ ի վեր»,- ասաց Հանեսյանը:
FMO-ի գլխավոր տնօրեն Նանո Կլեյտերպն իր հերթին կարևորեց գործարքի կնքումը՝ ընդգծելով, որ այդուհետ կշարունակեն «Ամերիաբանկ»-ի հետ համատեղ աշխատանքը:
Գործարքի կնքումը ողջունեց նաև ՀՀ Կենտրոնական բանկի նախագահի տեղակալ Ներսես Երիցյանը: Նրա խոսքով՝ «Ամերիաբանկ»-ը մշտապես իր ներդրումն ունի Հայաստանի տնտեսության զարգացման և աշխուժացման գործում: «Մենք էապես կարևորում ենք ֆինանսական համակարգում կապիտալիզացիայի զարգացման բարձր մակարդակը և ինստիտուցիոնալ նորդրողների մուտքը հայաստանյան ֆինանսական շումա: Այս դեպքում մենք գործ ունենք միջազգային շատ լուրջ ֆինանսական ընկերության հետ և շատ ուրախ ենք, որ FMO-ն վերջապես որոշում կայացրեց ներդրում անել Հայաստանի բանկային համակարգում,- ասաց Երիցյանը:
