Սաուդյան Արաբիայի խորհրդատվական խորհրդի արտաքին հարցերի հանձնաժողովը` «Շուրան», հայտարարել է, որ երկրում կա մոտ 5 մլն անօրինական ներգաղթյալ:
Այդ մարդիկ սահմանը հատել են անօրինական ճանապարհով: «Շուրան» կոչ է արել երկրի ներքին գործերի նախարարությանը այդ հարցը վերցնել իր ենթակայության տակ և անհապաղ գործողությունների անցնելով՝ այդ խնդրին լուծում տալ: Նրանց խոսքերով՝ անօրինական ներգաղթողները հիմնականում կենտրոնացած են Մեքքա, Ջիդդա, Թաիֆ, Մեդինա, Էր-Ռիյադ և այլ խոշոր քաղաքներում:
Հանձնաժողովը վիճակագրություն է ներկայացրել, որի համաձայն՝ հանցագործությունների 60 %-ը բաժին է ընկնում հենց ներգաղթողներին: Հանձնաժողովը նաև կոչ է անում արտաքին գործերի նախարարությանը օգտագործել դիվանագիտական բոլոր խողովակները անօրինական ներգաղթողներին իրենց ծագման երկրներ արտաքսելու համար:
Սաուդյան Արաբիայի բնակչությունը 20 մլն մարդ է, որին ավելանում են 8 մլն օտարերկրացիները, ովքեր օրինական են երկրում գտնվում: Օտարերկրացի աշխատավորների 85 %-ը ցածր վարձատրվող աշխատանք է կատարում:
