Տեսողության համաշխարհային օրվա նախօրեին Orange Հիմնադրամի, Ֆրանս-հայկական զարգացման հիմնադրամի և Հայ օգնության ֆոնդի համատեղ ջանքերով Երևանում բացվել է նոր Բրայլյան տպիչներով հագեցած ռեսուրս կենտրոն տեսողության խնդիրներ ունեցող երեխաների համար: Կենտրոնը տեղակայված է թիվ 14 հատուկ դպրոցում, ուր հաճախում են տեսողության տարբեր աստիճանի խնդիրներ ունեցող 89 երեխաներ, և որը հանրապետության միակ դպրոցն է, որտեղ ուսուցումն իրականացվում է Բրայլյան գրի կիրառմամբ: Orange Հիմնադրամի հատկացրած 4.5 միլիոն դրամով ձեռք բերված այս նոր Բրայլյան տպիչներն այժմ դպրոցի սաներին թույլ կտան ուսումնական գործընթացում օգտվել ուսումնակրթական ժամանակակից նյութերից, որոնք նախկինում հասանելի չէին՝ անհրաժեշտ սարքավորումների և ռեսուրսների բացակայությամբ պայմանավորված:
«Տեսողության խնդիրներ ունեցող մարդկանց աջակցությունն Orange Հիմնադրամի գործունեության առանցքային ուղղություններից մեկն է: Հույս ունենք, որ նոր սարքավորումներով հագեցած այս կենտրոնը կբարելավի այս երեխաների կյանքի որակը և կնպաստի վերջիններիս ուսումնական գործընթացի կազմակերպմանը՝ այսպիսով հեշտացնելով նրանց ինտեգրումը հասարակություն: Այս նախաձեռնությամբ մենք ուրախ ենք լրացնել Տեսողության համաշխարհային օրվան ընդառաջ Հայկական ակնաբուժության նախագծի հետ համատեղ իրականացվող մեր «1 selfie = 1 ակնոց» նախագծի առաքելությունը, որը դեռ շարունակվելու է մինչև վաղը և հնարավորություն է տալիս բոլոր ցանկացողներին պարզապես ուղարկել իրենց ինքնանկարը և այդքանով օգնել մեկ երեխայի ստանալ ակնոց: », – ասաց Orange Հիմնադրամի գլխավոր քարտուղար Լիլիթ Մարտիրոսյանը:
«Այս կենտրոնի հիմնադրմամբ մեր համեստ ներդրումն ենք ունենում տեսողության խնդիրներ ունեցող մարդկանց՝ հասարակությունից մեկուսացվածության մակարդակի նվազեցման գործում և ապահովում ենք վերջիններիս հասանելիությունը տեղեկատվությանը, քանի որ բոլոր մարդիկ հավասար են իրենց արժանապատվությամբ և իրավունքներով», – ասաց Ֆրանս-հայկական զարգացման հիմնադրամի հոգաբարձուների խորհրդի նախագահ պարոն Ալեն Թուհադյանը:
Նորաբաց կենտրոնը նաև կծառայի տեսողության խնդիրներ ունեցող երեխաների հետ աշխատող մասնագետներին, Մանկավարժական համալսարանում տիֆլոմանկավարժություն ուսումնասիրող ուսանողներին և Հայաստանի կույրերի միավորման անդամներին:
Հիշեցնենք, որ Orange Հիմնադրամի և Հայկական ակնաբուժության նախագծի համագործակցության շնորհիվ 2011թ.-ից ի վեր Հայաստանի մարզերում բնակվող ավելի քան 66,000 մարդ ստացել է անվճար ակնաբուժական ծառայություններ, որոնցից ավելի քան 5,000-ը ստացել են անվճար վիրահատություն կամ լազերային բուժում:
