Այս շաբաթ Ղրղըզստանում կշարունակվի Մաքսային միությանը երկրի անդամակցության հեռանկարի քննարկումը: Խորհրդարանի պատգամավորները պետք է վճռեն օրինագծերի առաջին փաթեթի ճակատագիրը: Ընդհանուր առմամբ կառավարությունը պատգամավորների դատին կներկայացնի 112 փաստաթուղթ, այդ թվում՝ 38 օրինագիծ: Միայն դրանց ընդունումից հետո է հնարավոր Մաքսային միությանը Ղրղըզստանի միանալու մասին համաձայնագրի վավերացումը: Այս մասին գրում է «Նեզավիսիմայա գազետան»:
Անդամակցության անհրաժեշտության լոբբինգով զբաղվում է էկոնոմիկայի նախարար Թեմիր Սարիևը: Անցած շաբաթ նա համոզել է պատգամավորներին, որ անդամակցությունը Մաքսային միությանը շահավետ է Ղրղըզստանի համար. կմեծանա արտահանման ծավալը, արդյունաբերությունը զարգացման հավելյալ խթան կստանա:
Պատգամավորները, ի տարբերություն պաշտոնյաների, անդամակցության թեմային թերահավատորեն են վերաբերվում: Խորհրդարանականները նշում են վերջին ամիսներին ռուսական տնտեսությունում աճող բարդությունները, խոսում ՄՄ անդամ երկրների տնտեսական զարգացման մեջ առկա տարբերության մասին:
Պատգամավորներին հատկապես անհանգստացնում է ավտոմոբիլային թեման: Անդամակցությունից հետո Ղրղըզստանի բնակիչները կարող են կորցնել Եվրոպայից և Հարավարևելյան Ասիայից second hand էժան ավտոմեքենա ձեռք բերելու հնարավորությունը:
Մեկ այլ պատճառ էլ պատժամիջոցների հետևանքով Ռուսաստանի տնտեսական դիրքերի թուլացումն է:
