ՀՀ կայուն զարգացման ռազմավարությամբ, ըստ նախնական հայտարարությունների, մինչև 2025թ. նախատեսվում էր 250 հազար աշխատատեղ ստեղծել: Այս ցուցանիշը մեծ տարակուսանք առաջացրեց փորձագետների շրջանում, քանի որ պաշտոնական տվյալներով` ՀՀ-ում գործազուրկների թիվը մոտ 80 հազար է: «Առաջին լրատվական»-ի տեղեկություններով՝ այնուհետև ստեղծվելիք աշխատատեղերի թիվը նվազեցվել է մինչև 170 հազար: Այս տվյալը փորձեցինք ճշտել ՀՀ ֆինանսների նախարար Վաչե Գաբրիելյանից:
«Փոփոխություններ են տեղի ունեցել: Շրջանառության մեջ դրված ծրագրում որպես թիրախ վերցված են ոչ գյուղատնտեսական աշխատատեղերը, հնարավոր են նաև կառուցվածքային փոփոխություններ: Իրական գործազրկության առումով ՀՀ-ն ունի բավականին լավ վիճակագրություն` եթե համեմատենք ԱՊՀ երկրների հետ, օրինակ՝ Վրաստանի, Տաջիկստանի, Ղրղըզստանի»,- ասաց Վ. Գաբրիելյանը՝ նշելով, որ իրենք չեն վերցնում այն մարդկանց թիվը, ովքեր նշված են զբաղվածության գործակալությունում, այլ ըստ տնային տնտեսությունների շրջանում անցկացված հարցումների` զբաղվածության թիվը 17.8% է:
Գաբրիելյանը մատնանշեց կառուցվածքային տեսակետից մեկ այլ խնդիր. բոլոր հող ունեցողները համարվում են գյուղատնտեսությունում զբաղվածներ:
Ըստ նախարարի՝ ներկայում մակրոտնտեսական պատկերն ամբողջովին այլ է, քան նախորդ ծրագրի հաստատման ժամանակ, և 2013-ին հաստատվելիք ծրագրերը չեն կարող նույն աճի տեմպերն արտահայտել. «Նախորդ ծրագրի աճի տեմպերը շատ ավելի բարձր էին, քան այժմ, և իրատեսական չէ, որ կարելի է ավելի շատ աշխատատեղեր ունենալ նման աճի պարագայում»:
