Մեծ Բրիտանիայի թագուհի Եղիսաբեթ II-ը որոշել է 2012-ի իր ավանդական ամանորյա հեռուստաուղերձն ազգին նվիրել բրիտանացի օլիմպիականների և պարօլիմպիականների հաջողություններին,- հայտնում է BBC-ն:
Դեկտեմբերի 25-ի ազգին ուղղված հեռուստաուղերձը պետության ղեկավարի միակ ելույթն է, որի տեքստն ինքնակալն ինքնուրույն է գրում: Այս տարի լրանում է ինքնակալի ամանորյա ուղերձի ավանդույթի 80-ամյակը. այն, ռադիոյով ելույթ ունենալով, ներմուծել է Եղիսաբեթի պապիկը՝ Գեորգ V թագավորը (1910-1936): Այս տարի առաջին անգամ արքայական խոսքը ձայնագրվել է և ավանդական հեռուստա-, ռադիո- և ինտերնետ-ձևաչափերի հետ կցուցադրվի նզաև 3D ձևաչափով:
«Լոնդոնն ունեցել է հրաշալի սպորտային ամառ, և բոլոր նրանք , ովքեր հետևել են Օլիմպիական և Պարօլիմպիական խաղերի հաջողություններին և ազարտին, ոգեշնչվել են մեր մարզիկների հմտությամբ, նվիրվածությամբ, պատրաստվածությամբ և թիմային ոգով: Հետապնդելով իրենց սպորտային նպատակները՝ նրանք մեզ բոլորիս հնարավորություն տվեցին միանալու այդ հիացմունքին և դրամատիզմին»,- ասված է թագուհու՝ Բուքինգհեմյան պալատում դեկտեմբերի 7-ին ձայնագրված ուղերձի հրապարակված հատվածում:
Թագուհին անձամբ է մասնակցել Օլիմպիական և Պարօլիմպիական խաղերի բացման արարողությանը և Մեծ Բրիտանիայում օլիմպիական տարվա այլ իրադարձություններին, որ համընկել են թագուոհւ կառավարման 60-ամյակի և ամուսնու՝ Էդինբուրգի դուքս Ֆիլիպի հետ համատեղ կյանքի 65-ամյակի հետ:
