«Պատգամավորը էթիկայի խախտում է թույլ տվել»,- ՀՀԿ-ական պատգամավոր Մհեր Սեդրակյանի` լրագրող Մհեր Արշակյանին սպառնալու վերաբերյալ «Երկիր Մեդիա» հեռուստաընկերության «Երկրի հարցը» հաղորդման եթերում ասել է ԱԺ էթիկայի հանձնաժողովի անդամ Զարուհի Փոստանջյանը, սակայն ձեռնպահ է մնացել հարցի արծարծումից, քանի որ հնարավոր է` դիմում ներկայացվի հանձնաժողովին, և ինքը չի կարող նախապես դիրքորոշում հայտնել: Ամեն դեպքում, ըստ նրա, տեղեկատվությունը, որ տարածված է Մհեր Սեդրակյանի վերաբերյալ, բավականին արատավոր կարծիք է ձևավորում քաղաքացիների մոտ նրա հասցեին առ այն, որ Մհեր Սեդրակյանը կարող է նաև իրականացնել իր սպառնալիքը, ուստի հարցի իրավական արծարծման համար կարևոր է իմանալ` սպառնալիքը իրատեսական է, թե՝ ոչ:
Անդրադառնալով կուսակցության` վաղը կայանալիք քաղաքացիական հավաքին, ԱԺ «Ժառանգություն» խմբակցության քարտուղարն ասել է, որ ուզում են հավաքը լինի ոչ թե զուտ կուսակցական իրադարձություն, այլ քաղաքացիների գաղափարների և բանավեճերի հարթակ, որտեղ պետք է հնչեն այդ քաղաքացիների և Րաֆֆի Հովհաննիսյանի մտահոգությունները: «Ամենակարևորը Րաֆֆի Հովհաննիսյանի խոսքն է. նա համապարփակ կներկայացնի իր տեսլականը մեր ապագայի նկատամբ, իր ցանկությունը համապատասխանում է մեր քաղաքացիների մտածումներին: Իհարկե, տեսակետ կհնչի նաև նախագահական ընտրությունների մասին, և քաղաքացիները կիմանան, որ Րաֆֆի Հովհաննիսյանը մտադրություն է հայտնում նախագահական ընտրությունների մասնակցության մասին»,- ասել է Զարուհի Փոստանջյանը: ԲՀԿ առաջնորդի չառաջադրումից «Ժառանգությունը» ոչ շահել է, ոչ էլ կորցրել, որովհետև իրենք գնում են իրենց ճանապարհով, իսկ նրանք, ովքեր հրաժարվել են, ըստ Փոստանջյանի, վստահ են եղել, որ դա իրենց ճանապարհը չէ:
«Մեր հաարակությունն ունի իր առջև մեկ խնդիր` հիմնադրել մի պետութուն, որը կարող է ծառայել հայ մարդուն, մարդ երբևիցե պետք է ցնկություն չունենա լքել Հայաստանը, այլ ամբողջ աշխարհում սփռված իր հայրենակիցներին ու բարեկամներին բերի իր շուրջը»,- ասել է պատգամավորը:
