News Georgia-ի փոխանցմամբ՝ Վրաստանի խորհրդարանական մեծամասնությունը տեսականորեն կարող է հաղթահարել Վրաստանի նախագահի վետոն: Այս մասին հայտարարել է Վրաստանի խորհրդարանի իրավական հանձնաժողովի նախագահ Վախթանգ Խմալաձեն՝ մեկնաբանելով նախագահ Սաակաշվիլիի՝ «Ընդհանուր դատարանների մասին» օրենքի վրա վետո դնելու մտադրությունը:
«Ընդհանուր դատարանների մասին» օրինագիծը ներկայումս դիտարկվում է խորհրդարանի կողմից, Սաակաշվիլիի խոսքերով՝ երկրի դատական համակարգը կարող է ամբողջովին կորցնել իր անկախությունը, եթե խորհրդարանը հաստատի օրինագիծը, որը նրա խոսքերով՝ հանգեցնելու է գործադիր իշխանությունների կողմից դատարանների վերահսկմանը: Դրա համար էլ Սաակաշվիլին խոստացել է վետո դնել դրա վրա:
Այս կապակցությամբ Խմալաձեն հայտարարել է. «Վետոյի հաղթահարման համար բավական է 89 քվե (խորհրդարանի 3/5-ը): Ներկայումս խորհրդարանական փոքրամասնությունն ունի 83 մանդատ և կա մեկ խմբակցություն՝ բաղկացած 6 հոգուց, որը չի դասվում խորհրդարանական ո՛չ մեծամասնության, ո՛չ էլ փոքրամասնության թվին:
Մենք կարծում ենք, որ նրանք նույնպես կաջակցեն վետոյի հաղթահարմանը, իսկ դա կլինի 89 պատգամավոր, ինչը բավական է վետոյի հաղթահարման համար: Ես ընդհանրապես չեմ կիսում այդ օրինագծի վերաբերյալ նախագահի կարծիքը: Օրինագիծն ամրապնդում է դատարանների անկախությունը»:
