«Ժամանակ» օրաթերթի գլխավոր խմբագիր Արման Բաբաջանյանն ու թերթի փաստաբան Նիկոլայ Բաղդասարյանն այսօրվա ասուլիսի ժամանակ անդրադարձան թերթի դեմ ներկայացված հայցերին:
Նիկոլայ Բաղդասարյանը տեղեկացրեց, որ թերթի դեմ միանգամից երեք հայց է ներկայացված: Ըստ նրա` հայց են ներկայացրել Ռոբերտ Քոչարյանի ընտանիքը, «Գլենդել Հիլզ» կազմակերպությունը և Թաթուլ Մանասերյանը:
Սակայն Բաղդասարյանի խոսքերով, իրենց անհանգստացնում է Քոչարյանների ընտանիքի ներկայացրած հայցը: Ըստ փաստաբանի` «Ժամանակ» օրաթերթում հրապարակվել է նրանց ունեցվածքի մասին լուրեր, և հիմա Քոչարյանի ընտանիքը հայտարարում է, թե դա իրականությանը չի համապատասխանում:
«Սակայն եթե անգամ դա չի պատկանում իրենց, չի կարող զրպարտանք և վիրավորանք լինել: Դա իրավունքի նոնսենս է»,- փաստեց փաստաբանը` հավելելով,- «Նույն փաստը չի կարող համարվել և´ զրպարտանք, և´ վիրավորանք: Եթե դուք վկայակոչում եք փաստ, զրպարտություն է, եթե արտահայտություն եք անում, վիրավորանք է»:
Նիկոլայ Բաղդասարյանը նաև նշեց, որ Քոչարյանի փաստաբանները խախտել են օրենքով նախատեսված հայցադիմում ներկայացնելու մեկամսյա ժամկետը:
Բացի այդ, նա ուշադրություն հրավիրեց այն հանգամանքի վրա, որ Ռոբերտ Քոչարյանի ընտանիքի փաստաբանը չի կատարում դատարանի պահանջները, այն է` չի ներկայացրել, թե կոնկրետ որ փաստերն են ընդունում վիրավորանք, որը` զրպարտություն:
Բացի այդ, չեն ներկայացրել անդորրագիր, որն ապացուցի այն դատական ծախսերը, որ Քոչարյանները պահանջում են օրաթերթից:
Հիշեցնենք, որ Քոչարյանները թերթից պահանջում են 6 մլն դրամ, որից 3 մլն-ը` զրպարտության և վիրավորանքի, ևս 3 մլն-ը` դատական ծախսերի համար:
Արման Բաբաջանյանը նշեց, որ օրաթերթում երկու անգամ հրապարակել են Քոչարյանների ուղարկած հերքումը, փորձեցին դատարանում հաշտության գալ: Սակայն նրանք մերժել են օրաթերթի առաջարկը:
«Այդպես հանրությանը ցույց տվեցինք, որ հայցի իրական նպատակը թերթին ֆինանսական վնաս հասցնելն է ու հաշվեհարդար տեսնելը»,- ասաց պարոն Բաբաջանյանը:
Թերթի գլխավոր խմբագիրը հիշեցրեց, որ պաշտոնավարման տարիներին Ռոբերտ Քոչարյանը հետապնդում է իրականացրել իր նկատմամբ և բանտարկել:
«Այժմ էլ նրան հանգիստ չի տալիս, որ ես ազատության մեջ եմ»,- ասաց Արման Բաբաջանյանը` հավելելով, որ ինքն, այնուամենայնիվ, չի ընկրկելու: Ըստ Բաբաջանյանի’ Քոչարյանը դեռ այն ժամանակ բանտ էր ուղարկել ազգային անվտանգության աշխատակիցների` առաջարկելով, որ Բաբաջանյանը թերթը փակի, որից հետո ազատ կարձակեն ու թույլ կտան հեռանալ երկրից:
«Իհարկե, իմ կողմից դա չընդունվեց: Սա այդ նույն ծրագրի շարունակությունն է»,- նշեց Արման Բաբաջանյանը’ հավելելով, որ իրենք թերթի դեմ ներկայացրած հայցերը բողոքարկելու են մինչև Մարդու իրավունքների եվրոպական դատարան:
