Աջափնյակ և Դավթաշեն վարչական շրջանների ընդհանուր իրավասության դատարանում Մարինե Մելքոնյանի նախագահությամբ ընթանում է Արթուր Մ.-ի գործի դատական քննությունը:
Ըստ մեղադրանքի՝ 26-ամյա Արթուրը 2012 թվականի հունիսին ստեղծել է «18plus.am» ինտերնետային կայքը և պոռնկագրական բնույթի նյութեր տարածելու դիտավորությամբ այդ կայքի «18+ խաղեր» բաժնում 2013 թվականի փետրվարի 17-ից մինչև 2014 թվականի հունվարի 31-ը տեղադրել է պոռնկագրական բնույթի պատկերներ և անիմացիոն խաղեր, որոնք ազատ հասանելի են եղել համացանցի բոլոր օգտատերերին:
Արթուր Մ.-ին մեղադրանք է առաջադրվել ՀՀ քրեական օրենսգրքի 263 հոդվածի 1-ին մասով: Խափանման միջոցը ստորագրությունն է չհեռանալու մասին:
Արթուրը բարձրագույն կրթություն ունի. ավարտել է ԵՊՀ-ն, տեղեկատվական տեխնոլոգիաների մասնագետ է: Նա ՍՊԸ-ի տնօրեն է:
Երբ մեղադրող Միքայել Գրիգորյանը հրապարակեց մեղադրական եզրակացության եզրափակիչ մասը, Արթուրն իրեն մեղավոր ճանաչեց և պաշտպան Գիվի Հովհաննիսյանի միջոցով միջնորդեց գործը քննել արագացված ընթացակարգով:
Պաշտպանը ներկայացրեց Արթուրի անձը բնութագրող փաստաթղթեր՝ դրական բնութագրեր բնակության և պարտադիր զինծառայության վայրերից, հավաստագրեր՝ համակարգչային հատուկ դասընթացներ անցնելու վերաբերյալ, դիպլոմներ՝ երրորդ տեղ գրավելու մասին. Արթուրը զբաղվում է պաուերլիֆտինգով:
Պաշտպանն Արթուրի արարքի վերաբերյալ մեր զրույցում ասաց, թե կայքի «18+» անվանումը երիտասարդին թյուրիմացության մեջ է գցել:
Նրան թվացել է, թե այդ վերտառությամբ կայքում կարող է տեղադրել որոշակի ուղղվածության պատկերներ ու անիմացիոն խաղեր: Չի իմացել, որ անգամ «18+» կոչվող կայքի միջոցով պոռնկագրական բնույթի նյութերի տարածումը քրեորեն հետապնդելի արարք է: Բայց չիմացությունը չի ազատում քրեական պատասխանատվությունից… Արթուրի գործը կարող է նման պատկերներ, տեսանկարահանումներ, ֆիլմեր ու խաղեր տարածելու սիրահարներին զգոնության կոչել:
Դատարանն անցավ կողմերի վիճաբանությունների ունկնդրմանը:
Մեղադրողը ժամանակ խնդրեց ճառին նախապատրաստվելու համար:
Հաջորդ դատական նիստը տեղի կունենա սեպտեմբերի 23-ին:
