Տարածաշրջանային հետազոտությունների կենտրոնը (ՏՀԿ) Հայաստանում Մեծ Բրիտանիայի դեսպանատան աջակցությամբ անցկացրեց հանրային քննարկում՝ նվիրված վերջերս Ուելսում կայացած ՆԱՏՕ-ի գագաթնաժողովին՝ Հայաստանի և Հարավային Կովկասի վրա դրա ազդեցության շեշտադրմամբ։
Միջոցառմանը ելույթ ունեցան Հայաստանում Մեծ Բրիտանիայի դեսպան Քեթրին Լիչը, Վրաստանում ՆԱՏՕ-ի ներկայացուցչական գրասենյակի ղեկավար Ուիլյամ Լահյուն, ՀՀ Ազգային ժողովի պաշտպանության, ազգային անվտանգության և ներքին գործերի հարցերով մշտական հանձնաժողովի նախագահ Կորյուն Նահապետյանը, ՏՀԿ ավագ փորձագետ Դավիթ Շահնազարյանը և ՏՀԿ տնօրեն Ռիչարդ Գիրագոսյանը։
Դեսպան Լիչն ասաց, որ Մեծ Բրիտանիան աջակցում է այն արդյունքներին, որոնք բերեց Ուելսում ՆԱՏՕ-ի գագաթնաժողովը: Ըստ նրա՝ 68 երկրների մասնակցությամբ այդ գագաթնաժողովն անցկացվեց այնպիսի պայմաններում, երբ Ռուսաստանը բռնակցեց Ղրիմը և տարածաշրջանում առաջացրեց անկայունություն՝ Լիբիայի ու Իրաքի ֆոնին մեծացնելով անկայունությունը:
«ՆԱՏՕ-ն տվեց իր արձագանքն այս բոլոր սպառնալիքներին: Գագաթնաժողովը շատ կարևոր նշանակություն ունեցավ: Այն կարևոր էր Հայաստանի ու Հարավային Կովկասի համար՝ ընդհանրապես: Հիմնական արդյունքն այն էր, որ մենք գործողությունների ծրագիր մշակեցինք»,- ասաց դեսպանը:
Վերջինիս համոզմամբ՝ պետք է լինի ավելի շատ և ավելի լավ ՆԱՏՕ, որը նշանակում է ավելի շատ ծախսեր և գործունեության ավելի լավ պլանավորում, ավելի մեծ հնարավորությունների տրամադրում:
Առաջարկում ենք մանրամասներին ծանոթանալ տեսանյութի միջոցով:
