Այսօր Ազգային ժողովի արտահերթ նիստում քննարկվում է տարբեր ապրանքների համար դրոշմանիշներ կիրառելու հարցը: Կառավարությունն առաջարկում է դրոշմանիշներ սահմանել ջրերի` ներառյալ բնական կամ արհեստական հանքային ջրերի, գազավորված ըմպելիքների, գարեջրերի, կոկտեյլների, հյութերի համար: Հետագայում ապրանքների ցանկը կմեծացվի:
Ինչպես նշեց ԱԺ տնտեսական հարցերով մշտական հանձնաժողովի նախագահ Վարդան Այվազյանը, կան տեխնիկական խնդիրներ, և կառավարությունը գնում է փուլային եղանակով:
Ֆինանսների փոխնախարար Սուրեն Կարայանի խոսքով՝ եվրոպական երկրներում դրոշմապիտակներ կիրառում են բոլոր ապրանքատեսակների վրա:
«Պետբյուջեի եկամուտների վրա օրենքի ազդեցությունը շատ դժվար է գնահատել: Մենք ուզում ենք առաջին հերթին կարգավորել նշված ապրանքատեսակների հաշվառման խնդիրները»,- նշեց փոխնախարարը:
Նախատեսվում է օրենքը ուժի մեջ մտցնել 2013 թվականի հուլիսի 1-ից:
