«Իրականում մենք 2011թ.-ին տնտեսական անկում ունենք, ոչ թե աճ»,- «Առաջին լրատվականի» հետ զրույցում այսօր նման տեսակետ հայտնեց ԱԺ պատգամավոր, տնտեսագետ Արծվիկ Մինասյանը` մեկնաբանելով Ազգային վիճակագրական ծառայության հրապարակած փետրվար ամսվա հիմնական մակրոտնտեսական ցուցանիշները:
Հիշեցնենք, որ 2011թ. փետրվարին Տնտեսական ակտիվության ցուցանիշը (ՏԱՑ) կազմել է 1.4%, շինարարության անկումը` 4.1%, արդյունաբերության աճը` 2.6%, գյուղատնտեսության աճը` 0.1%:
«ՏԱՑ-ը ցույց է տալիս, թե ռեսուրսների կամ սպասումների ինչ բաշխվածություն ունենք: Բայց դա չի կարող ուղղակիորեն նշանակել, որ մեր տնտեսությունը վերելքի փուլում է:
Փետրվարի այդ ցուցանիշները ցույց են տալիս, որ իսկապես մեր տնտեսությունը չի վերականգնվում: Եթե անգամ հետընթաց չկա, ապա տնտեսությունը տեղում դոփում է: Եթե շինարարության այդ անկումը, գյուղատնտեսության նույն մակարդակի մնալը, արդյունաբերության աննշան աճը մենք համեմատենք նաև սպառողական գների ինդեքսի հետ, ապա կտեսնենք, որ մեր տնտեսությունը անկում է ապրում:
Կարծում եմ` մարտին, երբ հրապարակվի նաև ՀՆԱ-ի վերաբերյալ ցուցանիշը, ավելի ակնհայտ կդառնա այս ցուցանիշների իրական վիճակը և կհաստատվի մեր այն պնդումը, որ ՀՀ տնտեսությունը շարունակում է անկումը»,- ասաց Ա. Մինասյանը: