Քիչ առաջ ավարտվեց ոչ իշխանական քառյակի աշնանային առաջին նիստը։ Քառյակի հանդիպմանը քննարկված հարցերը ներկայացրեց Դաշնակցություն խմբակցության ղեկավար Արմեն Ռուստամյանը։
Վերջինս փոխանցեց, որ այս անգամ քննարկել են մոտ մեկ տասնյակ հարցեր։ Նախ՝ քննարկվել է իշխանությունների նախաձեռնած սահմանադրական փոփոխությունների հարցը։ Ա. Ռուստամյանի փոխանցմամբ՝ քառյակից ՀԱԿ, «Բարգավաճ Հայաստան» և «Ժառանգություն» խմբակցությունները դեմ են այդ փոփոխություններին, իսկ Դաշնակցությունը կողմ է։ Այս հարցի հետ կապված որոշվել է, որ յուրաքանչյուր քաղաքական ուժ ազատ է իր դիրքորոշումներում և պետք է հարգի մյուսների տեսակետը։
Քննարկվել է նաև Կուտակային կենսաթոշակների մասին նոր օրենքը Սահմանադրական դատարանում կրկին վիճարկելու հարցը, ինչին կողմնակից են ԲՀԿ-ն և ՀՅԴ-ն: ՍԴ դիմելը նպատակահարմար չեն համարում ՀԱԿ-ը և «Ժառանգությունը»։ Այս երկու խմբակցություններն, այնուամենայնիվ, որոշել են ՍԴ դիմելու հարցում միանալ ԲՀԿ-ին ու ՀՅԴ-ին։
«Առաջին լրատվական»-ի հացին՝ ՀՅԴ-ն այդ երկու կուսակցությունների նման չէ՞ր կարող զիջել, որ այդ հարցում էլ քառյակում միասնական տեսակետ լիներ, Ա. Ռուստամյանը պատասխանեց, թե այդ հարցն իրենց համար սկզբունքային է, և թող մյուս ուժերն այդ հարցում էլ իրենց տեսակետին միանան։
Առուստամյանը նաև ասաց, թե քննարկել են նաև հանրահավաք անցկացնելու հարցը, բայց դեռ կոնկրետ օրը կորոշեն առաջիկայում։ Քննարկել են նաև իշխանություններին ուղղված 12 կետից բաղկացած պահանջների կատարման հարցը, բայց դեռ չեն որոշել, թե հանրահավաքում ինչ հարցեր են քննարկելու։ Արդյոք հանրահավաքում վարչապետի կամ նախագահի հրաժարականի պահանջ հնչելու է, Ա. Ռուստամյանը պատասխանեց, որ այդ հարցն էլ դեռ չի քննարկվել։
Ի դեպ, քառյակի ուժերը դիմել են Ազգային ժողովի նախագահ Գալուստ Սահակյանին խորհրդարանական լսումներ հրավիրել «Արտագաղթ. իրավիճակը, պատճառներն ու լուծումները» թեմայով
