Հունաստանի տնտեսությունը վեց տարվա անկումից հետո այս տարվա երրորդ եռամսյակում աճ է արձանագրել, հայտարարել է երկրի վարչապետ Անտոնիս Սամարասը: Նա շաբաթ օրը ելույթ է ունեցել Սալոնիկի 79-րդ Միջազգային ցուցահանդեսին, որտեղ կառավարությունը ավանդաբար ներկայացնում է ամենամյա տնտեսական ծրագիրը, գրում է RIA Novosti-ն:
Նա հայտարարել է նաև, որ մոտակա ամիսներին Հունաստանը առաջին անգամ հաստատում կստանա այն մասին, որ նրա պարտքը կառավարելի է:
«Չնայած երկրի պարտքը, նախկինի պես, շատ բարձր է, այն առաջին անգամ սկսել է նվազել, չնայած՝ աննշան: Եվ երբ ՀՆԱ-ն կաճի, այն ավելի արագ կսկսի նվազել»,- ասել է վարչապետը:
Վիճակագրական ծառայության տվյալների համաձայն՝ ընթացիկ տարվա երկրորդ եռամսյակում ՀՆԱ-ն նվազել է 0,3%-ով: 2008թ. երկրորդ եռամսյակից հետո սա լավագույն ցուցանիշն է:
Սամարասը կրկին հայտարարել է, որ կառավարությունը կնվազեցնի հարկերը, մասնավորապես, տների ջեռուցման համար անհրաժեշտ դիզելային վառելիքի, ինչպես նաև ապահովագրական հիմնադրամներում ներդրումների վրա:
Վարչապետը խոստովանել է, որ կառավարությունը անշարժ գույքի միացյալ հարկը հաշվարկելիս սխալներ է թույլ տվել, որոնք այս պահին քննարկվում են ֆինանսների նախարարությունում և խորհրդարանում:
Սամարասը նշել է. «Ընդամենը մի քանի տարի առաջ անշարժ գույքի համար 400 հազար մարդ էր հարկեր վճարում: Այժմ կազմվել է ամբողջական ցուցակը՝ 6,15 միլիոն հարկատուներ: Ընդամենը երկու տարում կարգուկանոն է հաստատվել»,-հայտնել է վարչապետը:
Սամարասը տեղեկացրել է նաև, որ բժշկական ապահովագրության ոլոտում կարգուկանոն հաստատելուց հետո դեղորայքի գները կրկնակի նվազել են, իսկ թոշակային համակարգից տասնյակ հազարավոր կեղծ թոշակառուներ են հանվել: Նրանք արդեն պետությանը վերադարձրել են 42 միլիոն եվրո անօրինականորեն ստացած թոշակները:
Չլուծված խնդիրների շարքում վարչապետը նշել է անօրինական միգրացիան, պաշտոնյաների աշխատանքի բարելավումը:
Սալոնիկի միջազգային ցուցահանդեսը կազմակերպվում է 1925թ. սկսած: Ցուցահանդեսի սկզբին ավանդաբար ընդդիմությունը բողոքի ակցիա է անցկացնում: Քաղաքում առավոտից ուժեղացվել են անվտանգության միջոցառումները: Սալոնիկի անվտանգությունը կապահովեն 4 հազար ոստիկաններ:
