Այսօր՝ դեկտեմբերի 14-ին, ՀՀԿ-ն հրավիրել է գործադիր մարմնի և խորհրդի նիստ:
Նիստից հետո ՀՀԿ խոսնակ, Ազգային ժողովի փոխնախագահ Էդուարդ Շարմազանովը լրագրողներին տեղեկացրել է, որ հաստատվել է դեկտեմբերի 15-ի ՀՀԿ համագումարի օրակարգը:
Շարմազանովը հայտնել է, որ և՛ գործադիրը, և՛ խորհուրդը միաձայն ընդունել են տարբեր սկզբնական և տարածքային կառույցների առաջարկները` Հայաստանի նախագահի թեկնածու առաջադրել ՀՀԿ նախագահ Սերժ Սարգսյանին: Իսկ համագումարում կլինի Սերժ Սարգսյանի ծրագրային ելույթը: Համագումարի պատվիրակներին կտրամադրվի նաև նախընտրական ծրագրի նախագիծը:
«Այնուհետև օրենքով սահմանված կարգով և ժամկետներում մոտ մեկ ամիս հետո առաջարկներ կստանանք, և մեր վերջնական նախընտրական ծրագիրը կուսակիցների առաջարկների հիման վրա վերջնական տեսք կունենա, և կներկայացնենք մեր հասարակությանը»,- նշել է ՀՀԿ խոսնակը:
Շարմազանովը մեկ անգամ ևս հիշեցրել է, որ ՀՀԿ-ն ժողովրդավարական արժեքներ դավանող ուժ է, և երբեք «ուլտիմատումներով, պարտադրանքներով առաջ չենք շարժվում»:
«Անկախ այլ քաղաքական ուժերի առաջադրումներից՝ մենք ունենք մեր սցենարը։ Անկախ այլ քաղաքական ուժերի նպատակներից, ախորժակից և ցանկություններից՝ ՀՀԿ-ն գնալու է ապահով Հայաստան կառուցելու ճանապարհով»,- իր խոսքը եզրափակել է ՀՀԿ խոսնակը:
