Դերասան Ջորջ Քլունին ֆիլմ կնկարահանի մեդիամագնատ Ռուպերտ Մերդոկին պատկանող բրիտանական News of the World թերթում հեռախոսային խոսակցությունների գաղտնալսման հետ կապված սկանդալի մասին: «Ցանցահենային հարձակում» ֆիլմը հիմնված կլինի բրիտանացի լրագրող Նիք Դևիսի համանուն գրքի վրա: Արտադրությամբ կզբաղվի Sony Pictures ընկերությունը: Ծրագրվում է նկարահանումները սկսել հաջորդ տարի, հայտնում է Variety-ն:
«Այդ պատմության մեջ լավ ֆիլմի բոլոր տարրերը կան՝ սուտ, կոռուպցիա, շանտաժ, և դա՝ բարձր մակարդակով, չէ՞ որ խոսքը Լոնդոնի խոշորագույն թերթի մասին է: Նիքը համարձակ ու համառ լրագրող է, ուստի նրա գրքի հիման վրա ֆիլմ ստեղծելը մենք մեծ պատիվ ենք համարում»,- նշել է Քլունին:
Դևիսի ստեղծագործության սյուժեի հիմքում News of the World թերթի դեմ 2005-2006 թթ. քրեական գործն է, որը վերսկսվել է 2011-ին: Պարբերականի աշխատակցիները կասկածվում էին մասնավոր, այդ թվում՝ քաղաքական գործիչների և հայտնիների հեռախոսային խոսակցությունների անօրինական գաղտնալսման, նաև տեղեկություն ստանալու նպատակով ոստիկանության և հատուկ ծառայությունների աշխատակիցներին կաշառելու և շանտաժի համար: 2011-ի հուլիսի 10-ին 168 տարի գոյություն ունեցած թերթը փակվել է:
