Ռուսաստանի և Աբխազիայի միջև անվտանգության միասնական կոնտուրը կարող է դառնալ եռակողմ: Նորաստեղծ ռազմական դաշինքին միանալու բանակցությունները վարում է Հարավային Օսիան, որը մտադիր է դրան միանալ որքան հնարավոր է շուտ: Բանն այն է, որ Սուխումն ու Ցխինվալը չեն կարող դառնալ Հավաքական անվտանգության մասին պայմանագրի կազմակերպության անդամ, քանի որ կազմակերպության մյուս անդամները չեն համարում դրանք անկախ պետություններ:
Բարեկամության և փոխօգնության մասին նոր պայմանագիրը, որում նախատեսվում է մինչև տարեվերջ Ռուսաստանի և Աբխազիայի միջև միասնական կոնտուրի ստեղծում, կարող է դառնալ եռակողմ: Միանալու բանակցությունները Աբխազիայի հետ վարում է Հարավային Օսիան: Այս մասին գրում է «Իզվեստիա» թերթը՝ հղում անելով Աբխազիայում Հարավային Օսիայի դեսպան Օլեգ Բոցիևին:
Աբխազական իշխանությունները հաստատել են, որ բանակցություններ են ընթանում, և հայտարարել են, որ խոսքը հզոր դաշինքի ստեղծման մասին է՝ «ՆԱՏՕ-ի օրինակով և ի հակազդեցություն (ՆԱՏՕ-ի)»:
