News Georgia-ի փոխանցմամբ՝ Վրաստանի սահմանադրությունն արգելում է իր քաղաքացիներին այլ երկրներին հանձնել, ինչի համար էլ անհնար է քաղաքական գործիչ Գիվի Տարգամաձեի արտահանձնումը Ռուսաստանին, եթե, իհարկե, նա հանդես գա այդպիսի առաջարկով: Այս մասին նշված է Վրաստանի գլխավոր դատախազության մամուլի ծառայության այսօրվա տարածած հաղորդագրությունում:
Դրանում նաև ասվում է, որ Տարգամաձեի նկատմամբ հետաքննություն կարող է սկսվել միայն երկրի ներսում՝ համապատասխան հայտի հիման վրա: Սովորաբար այդպիսի հայտերի վրա ծախսվում է երեք շաբաթ ժամանակ:
Ռուսաստանի Հետաքննչական կոմիտեի պաշտոնական ներկայացուցիչ Վլադիմիր Մարկինը երեկ հայտարարել էր, որ իրենք ապացույցներ ունեն, որ Տարգամաձեն ոչ միայն ֆինանսավորել է ռուսական ընդդիմությանը, այլև կոնկրետ դեր է խաղացել «Բոլոտնայա» հրապարակում զանգվածային անկարգությունների կազմակերպման մեջ, ինչպես նաև անմիջապես ղեկավարել է Մոսկվայում «Միլիոնների երթի» անցկացման ժամանակ ռուսական ընդդիմության առաջնորդների գործողությունները:
