Բրազիլիայի դատարանի որոշմամբ Apple ընկերությունը Secret բջջային հավելվածը հեռացրել է App Store խանութից՝ հայտնում է VentureBeat պարբերականը:
Ավելի վաղ բրազիլացի դատավորը պահանջել էր արգելել Secret-ի տարածումը Բրազիլիայում՝ դա բացատրելով նրանով, որ ծառայությունը թույլ է տալիս անանուն ծաղրել մարդկանց: Մասնավորապես, նա պահանջել էր հեռացնել ծրագիրը Apple App Store-ից ու Google Play-ից՝ սպառնալով ընկերություններին 20 հազար ռեալ տուգանքով (մոտ 9 հազար դոլար) ամեն օրվա համար այն ժամկետից հետո, երբ Secret-ը պետք է հեռացվեր կատալոգներից:
Նա նաև պահանջել էր Microsoft-ից հեռացնել Cryptic ծառայությունը, որը թույլ է տալիս աշխատել Secret-ի հետ, ինչպես նաև Windows Phone հարթակի հավելվածների խանութից:
Վերջապես դատավորը ցանկանում է, որ Secret-ը հեռացվի այն օգտատերերի սմարթֆոններից ու պլանշետներից, որտեղ արդեն տեղադրված է հավելվածը:
Կատարե՞լ են արդյոք Google-ն ու Microsoft-ը պահանջվող գործողությունները՝ չի ճշտվում, սակայն նրանք մեկ շաբաթ ունեն պահանջները իրագործելու համար:
Բրազիլիայի օրենքների համաձայն՝ օգտատերերն իրավունք ունեն ինքնարտահայտվել համացանցում, սակայն միայն այն դեպքում, երբ հանդես են գալիս իրենց անունից:
Secret-ում գրանցվելուց հետո օգտատերը կարող է ուղարկել անանուն հաղորդագրություններ ու կարդալ մյուսների գրառումները:
