Կոտայքի մարզի ընդհանուր իրավասության դատարանում Մխիթար Պապոյանի նախագահությամբ սկսվում է Գառնիկ Դանիելյանի գործի դատական քննությունը:
29-ամյա երևանցի Գառնիկ Դանիելյանը նախկինում փաստական ամուսնական հարաբերությունների մեջ է եղել Ասյա Յ.-ի (անունը փոխված է) հետ:
Ըստ մեղադրանքի՝ 2014 թվականի ապրիլի 9-ին, ժամը 20-ի սահմաններում մարզի Քասախ գյուղի գերեզմանատան մոտ կայանված «Դեու Նեքսիա» ավտոմեքենայի սրահում Ասյայի նկատմամբ բռնություն գործադրելով, ապա որպես զենք օգտագործած պտուտակահանով սպառնալով՝ նրա կամքին հակառակ սեռական հարաբերություն է ունեցել հետը:
Այնուհետև, ըստ մեղադրանքի, Գառնիկ Դանիելյանը ապրիլի 9-ից մինչև 17-ը երեխաներին տեսակցելու պատրվակով բազմիցս այցելել է Ասյային, ստիպել է, որ նա փոխի նախկինում տված ցուցմունքները, տա սուտ ցուցմունքներ՝ իբր վերոհիշյալ սեռական հարաբերությունը տեղի է ունեցել իր կամքով:
Հակառակ դեպքում, առաջադրված մեղադրանքի համաձայն, Գառնիկը սպառնացել է սպանել Ասյային կամ նրա առողջությանը վնաս պատճառել:
Գառնիկ Դանիելյանին մեղադրանք է առաջադրվել ՀՀ քրեական օրենսգրքի 138 հոդվածի 2-րդ մասի 7-րդ կետով և 340 հոդվածի 2-րդ մասով:
Դանիելյանի խափանման միջոցը կալանավորումն է:
