Լեհաստանի գյուղատնտեսության նախարարությունը պատրաստվում է բողոք ներկայացնել Առևտրի համաշխարհային կազմակերպություն՝ կապված Ռուսաստանի կողմից ԵՄ-ից սննդամթերքի ներմուծման արգելքի հետ:
Լեհաստանի գյուղատնտեսության նախարար Մարեկ Սավիցկիի խոսքով՝ բողոքը փոխանցվել է փոխվարչապետ, էկոնոմիկայի նախարար Յանուշ Պեխոչինսկուն, քանի որ նա է պատասխանատու այդ կազմակերպության հետ համագործակցության համար:
ԵՄ պատժամիջոցների դիմաց Ռուսաստանի պատասխան գործողությունների հետևանքով լեհական ագրարային ոլորտը լրջորեն տուժել է: Նախնական հաշվարկներով՝ դեպի Ռուսաստան բանջարեղենի ու մրգերի ներմուծման արգելքի պատճառով Լեհաստանի կորուստները կարող են կազմել 500 մլն եվրո:
Ապագա կորուստներն են հաշվում նաև կաթնամթերք արտադրողները: Նախկինում լեհական պանրի յուրաքանչյուր 5-րդ տոննան ուղարկվել է Ռուսաստան: Իսկ Լեհաստանի արևելքում տնտեսական դժվարությունների են պատրաստվում միս արտադրողները:
Ավելի վաղ Լեհաստանը դիմել էր ԱՄՆ-ին՝ լեհական խնձորների համար շուկա բացելու խնդրանքով:
