ԱՄՆ նախագահի օգնականի՝ ազգային անվտանգության հարցերով տեղակալ Բեն Ռոդսը ուրբաթ Սպիտակ տանը հանդիպել է Իրաքի եզդիական համայնքի ներկայացուցիչների հետ և հավաստիացրել նրանց, որ ԱՄՆ-ը պատրաստ է պաշտպանել նրանց ցեղասպանությունից:
«ԱՄՆ-ը կգործի զգույշ և պատասխանատու կերպով, որպեսզի կանխի ցեղասպանության հնարավոր գործողությունները»,- ասվում է Սպիտակ տան հաղորդագրության մեջ:
Հանդիպման ընթացքում Ռոդսը իր հիացմունքն է հայտնել եզդիների բազմադարյա պատմության նկատմամբ՝ ընդգծելով, որ ԱՄՆ-ը ցանկանում է աջակցել այդ ժողովդին և կշարունակի նրանց մարդասիրական օգնություն տրամադրել: ԱՄՆ-ը նաև կաշխատի միջազգային գործընկերների հետ՝ եզդիների խնդրին երկարատև լուծում տալու համար, ասվում է հաղորդագրության մեջ:
Ավելի վաղ ԱՄՆ նախագահը հայտարարել էր, որ Իրաքի հյուսիսում եզդիներին և քրիստոնյաներին սպառնում է ցեղասպանության վտանգը: Օբամայի խոսքով եզդիներին և ամերիկյան հյուպատոսությունը պաշտպանելու համար ինքը հավանություն է տվել իսլամիստների դիրքերին սահմանափակ ռազմական հարվածներ հասցնելուն: Առնվազն 3 այդպիսի հարված հասցվել է ուրբաթ օրը:
