«Ռուսաստանի նախագահ Վլադիմիր Պուտինի առաջիկա նպատակները կարող էին սահմանափակվել Ղրիմի վերադարձով և Ուկրաինայի իրադարձություններում որոշակի ազդեցության պահպանմամբ, սակայն նրա երկարաժամկետ մտադրությունները շատ ավելի հավակնոտ են»,-գրում է The Guardian-ը:
«Այդ հավակնությունները բարդ չէ կռահել: Հայտնի է, որ Պուտինը մի օր նկատել է, թե ԽՍՀՄ-ի անկումը 20-րդ դարի մեծագույն աղետն է: Այսպիսով, նրա նպատակը դարձավ դրա վերականգնումն այս կամ այն տեսքով, հնարավոր է` որպես անդամ երկրների միություն` ԵՄ-ի օրինակով»,- գրված է հոդվածում: Նման միավորում, ըստ հեղինակի, պետք է դառնա Եվրասիական միությունը:
«Չնայած ԵՏՄ-ն դեռևս միայն Մաքսային միություն է, Եվրամիության փորձը ցույց է տալիս, որ ազատ առևտրի հաջողված գոտին ժամանակի ընթացքում հանգեցնում է ավելի լայն տնտեսական, արժութային և վերջում՝ քաղաքական ինտեգրման: Ռուսաստանի նպատակն է ոչ թե կրկնել Հյուսիսամերիկյան համաձայնագիրը ազատ առևտրի վերաբերյալ, այլ նոր ԵՄ ստեղծել, որտեղ կառավարման լծակները Կրեմլի ձեռքում կլինեն»,- ասվում է հոդվածում:
«Համընդհանուր մաքսային միության հայտնվելուց հետո ֆինանսական և ներդրումային կապերն այն աստիճան են մեծանում, որ երկրները հավասարեցնում են միմյանց նկատմամբ փոխանակման կուրսերը: Հետո հավանական է՝ դրա ստեղծումից մի քանի տասնամյակ անց մասնակիցները մտածեն միասնական արժութային միավորով իրական ֆինանսական միավորման մասին, որը կարող է օգտագործվել որպես արժեքի, հաշվարկների և կուտակումների միջոց: Հրաժարվելով բանկային, հարկային և տնտեսական ինքնիշխանությունից` մասնակիցները կարող են մասնակի քաղաքացիական կապի անհրաժեշտություն զգալ` ժողովրդավարական օրինականության երաշխիքների համար»,- գրում է հեղինակը:
«ԵՏՄ-ն`իր ամբողջական ծավալով, որն աստիճանաբար կնվազեցնի արևմուտքի հետ կապերը առևտրի, ֆինանսների, տնտեսության, վճարման համակարգերի, հաղորդակցման և քաղաքական կապերի ոլորտում, կարող է չիրականացվող երազանք լինել: Ռուսաստանում բարեփոխումների բացակայությունը և ոչ բարեհաջող ժողովրդագրական միտումները աճի պոտենցիալ ցածր տեմպեր և ֆինանսական միջոցների պակաս են կանխագուշակում հարկային և տրանսպորտային միասնականություն ստեղծելու համար»:
«Պուտինը, սակայն, հավակնոտ մարդ է, և Կենտրոնական Ասիայի ավտոկրատների նման կարող է տասնյակ տարիներ իշխանության գլուխ մնալ: Բացի այդ, դուր է գալիս դա ձեզ թե ոչ, Ռուսաստանը կմնա ապրանք արտադրող գերտերություն», – ընդգծվում է հոդվածում:
«Դժբախտաբար, պատժամիջոցները, որոնք Ռուսաստանի նկատմամբ սահմանում են ԱՄՆ-ն ու Եվրոպան, իրենց ողջ անհրաժեշտությամբ հանդերձ, կարող են միայն համոզել Պուտինին և նրա խորհրդականներին, որ Ռուսաստանի ապագան արևմուտքում չէ, այլ առանձին ինտեգրացիոն նախագծում` Արևելքում: ԱՄՆ նախագահ Բարաք Օբաման պնդում է, թե սառը պատերազմի սկզբի մասին խոսք չկա, սակայն ներկայիս միտումները շուտով կարող են հերքել նրա խոսքերը»,- ամփոփում է հեղինակը:
