Մայրամահացության դեպք Երևանի Գրիգոր Լուսավորիչ բժշկական կենտրոնում: 4-րդ երեխան ծննդաբերելու ժամանակ մահացել է 28-ամյա կինը: Կատարվածի վերաբերյալ ԳԱԼԱ–ի լրագրողին մանրամասներ է պատմել մահացած կնոջ՝ Սյուզաննա Իսրայելյանի մայրը՝ Հասմիկ Հովհաննիսյանը: Դեպքը տեղի է ունեցել օգոստոսի 1-ի լույս 2-ի գիշերը: Տիկին Հասմիկը նախ պատմել է, որ իր աղջիկը երեք երեխաների ծննդաբերության ժամանակ ոչ մի խնդիր չի ունեցել, բժշկական բոլոր հետազոտությունները ժամանակին անցել է: «Երեխուն ուղարկել են էխոյի, ամեն ինչը նորմալ է, ցավերը բռնել է, բերել են Գրիգոր Լուսավորիչ հիվանդանոց, այդտեղ էլ ստուգել են, ճնշումը 120-80 է եղել, տարել են նորից էխոյի, ոչ մի առողջական խնդիրներ չի ունեցել, բարձրացրել են ծնարան»,- պատմել է Հասմիկ Հովհաննիսյանը:
Նրա խոսքով՝ դրանից հետո անցել է մեկ ժամ, և ինքը զանգահարել է ծնարան և հետաքրքրվել ընթացքի մասին: Այնտեղից փոխանցել են, որ ամեն ինչ նորմալ ընթանում է: «Անցնում է կես ժամ, ես տանից իջնում եմ, հաց եմ սարքում, որպեսզի տանեմ, հասնում եմ հիվանդանոց, ինձ այնտեղ ասում են, որ երեխու վիճակը շատ վատ է»: Հասմիկ Հովհաննիսյանը հայտնեց, որ ինքը փորձել է իմանալ, թե ինչու կարճ ժամանակահատվածում աղջկա վիճակը վատացավ: Բժիշկները հայտնել են, որ նա ուշաթափվել է և կլինիկական մահ է տարել: «Ասում եմ, բայց ինչո՞ւ, ի՞նչն է պատճառը եղել, ես ուզում եմ բժշկին տեսնեմ, ինքը ոչ մի խնդիր չի ունեցել:
Բժիշկը իջավ, ինձ բացատրում է, որ իրան ստուգել է, նորմալ է եղել, արդեն երեխան պետք է ծննդաբերեր, ես շուռ եմ եկել մյուս հիվանդին ստուգելու, ինքը այդ պահին ուշաթափվել ընկել է»,- պատմեց տիկին Հասմիկը: Նրա մոտ հարց է առաջանում. եթե իր աղջկան տարել են ծնարան և նախապատրաստել ծննդաբերության, ապա ինչո՞ւ է աղջիկը կանգնած եղել և ուշաթափվել ու ընկել հատակին: «Տվել է արյունահոսություն, դրանից հետո երեխուն քաշել է զոռով հանել է, արդեն իմ աղջկաս սիրտը կանգնել է, երեխու սիրտն էլ է կանգնած եղել, մտցրել են ապարատի մեջ, որ ապարատով սիրտը աշխատեցնեն, ապրի: Երեխայի մոտ արյունահոսություն է սկսվել, որը կանգնեցնել հնարավոր չի եղել, և արգանդը հեռացրել են: Վիրահատությունը կատարել են 20 րոպեի ընթացքում, բայց այդ վիրահատությունը պետք է տևեր 2-ից 3 ժամ: Բժշկին հարցնում եմ, ասում է՝ ես կարճ ժամանակում եմ անում»,- նշել է Հասմիկ Հովհաննիսյանը:
Մանրամասները՝ ԳԱԼԱ-ում
