Գազայի հատվածում ռազմական հանցագործությունների վկայությունների թիվն աճում է, ՄԱԿ-ի դպրոցների հրթիռակոծումները միջազգային հումանիտար իրավունքի խախտում են: Ria Novosti-ի տեղեկացմամբ՝ այս մասին Ժնևում հայտարարել է ՄԱԿ-ի մարդու իրավունքների գերագույն հանձնակատար Նավի Փիլեյը:
«Հումանիտար առաքելությունների և բացառապես հումանիտար գործողությունների համար օգտագործվող օբյեկտների աշխատակիցների նկատմամբ գրոհները միջազգային հումանիտար իրավունքի խախտում են և կարող են որակվել որպես ռազմական հանցագործություն»,- հայտարարել է նա:
Փիլեյը հիշեցրել է, որ օդային հարվածներ են հասցվել ՄԱԿ-ի 6 դպրոցների, որտեղ պաղեստինյան տարածքի մշտական գնդակոծություններից պատսպարվում են խաղաղ պաղեստինցիները, հիմնականում՝ կանայք և երեխաներ:
ՄԱԿ-ի մարդու իրավունքների գերագույն հանձնակատարի վարչության տվյալներով՝ Գազայի հատվածում Իսրայելի ռազմական գործողության սկզբից զոհվել է ավելի քան 1200 պաղեստինցի, ներառյալ՝ 850 խաղաղ բնակիչ: Ավելի քան 250.000 մարդ ստիպված լքել է իր տունը:
Փիլեյը նշել է նաև Գազայի հատվածից զինված խմբավորումների կողմից Իսրայելի տարածքի անկանոն հրետանային ռմբակոծությունների մասին: Նրա խոսքով՝ զինված գործողության ընթացքում Իսրայելի կողմից պաղեստինյան տարածքի ուղղությամբ մոտ 4000 հրթիռ է արձակվել: Միաժամանակ, Գազայի հատվածից Իսրայելի ուղղությամբ արձակվել է ավելի քան 3500 հրթիռ, ինչը, ՄԱԿ-ի մարդու իրավունքների գերագույն հանձնակատարի վարչության տվյալներով, հանգեցրել է 3 քաղաքացիական անձի մահվան Իսրայելի տարածքում:
