ՀԱԿ խմբակցությունը 2013թ. բյուջեի նախագծի փոփոխությունների 40 առաջարկներ էր ներկայացրել կառավարությանը, որոնցից ոչ մեկը չի ընդունվել: Այսօր ԱԺ-ում նախագծի վերջնական տարբերակի քննարկման ժամանակ ՀԱԿ պատգամավոր Հրանտ Բագրատյանը նշեց, որ առաջարկներից մեծ մասին կառավարությունը «շատ անուշ էր մոտեցել»՝ նշելով, որ դրանք համահունչ են տնտեսական քաղաքականությանը:
Բագրատյանը հայտարարեց, որ խոշոր հարցերից ամենակարևորը, որը նաև Սահմանադրության խախտում է, եկամուտներն են, որը թռուցիկ է ներկայացվել, բայց 76-80 մլրդ դրամի տարբերություն կա ԱԱՀ-ի հաշվարկից: ՀՆԱ-ն՝ ողջ արտադրվածը կամ եկամուտներն ու տուրքերը պետք է նույնը լինեն, բայց, պատգամավորի հաշվարկով, 350 մլն դրամ պակասում է: «Կամ գրում եք օդից, կամ եկեք գտնենք: Ո՞վ չգիտի այդ փողերի տեղը: Կա նախագահ, կա ԱԺ, կա կառավարություն: Շահութահարկն առնվազն 300 մլրդ պետք է լինի, 127 ունենք: Ասում ենք՝ շատ մոնոպոլիաներ կան` չէ, շատ չի: Բացեք Շաբոյանենց կայքը, գրված է: Կարող ենք ասել, որ մենաշնորհներ ունես, 50% շահութահարկ տուր»,- ասաց Հ. Բագրատյանը:
Պատգամավորի խոսքով՝ մինչև 2000թ. բյուջեի եկամուտները հաստատվել են տողերով: Ըստ նրա՝ մոտ 400 մլրդ դրամ առնվազն բացակայում է բյուջեից, կամ էլ մենք չունենք այդ ՀՆԱ-ն. «27 մլրդ վերցնում եք ստվերից, բայց 50 մլրդով էլ ավելացնում եք: Չենք տեսնում մտահոգություն: Այդ ճանապարհով որ դուք տանում եք, թունելի վերջում լույս չի երևում»:
Բագրատյանը նկատեց, որ ամեն անգամ իշխանավորները օրինակ են բերում 90-ականները, բայց այս տարվա բյուջեն առանձնապես ավելի չի այն ժամանակվա բյուջեից: Բագրատյանի կարծիքով՝ մաքսատուրքերը` 70-80%, ԱԱՀ-ն՝ 55%, ուղղակի հարկերը 1/3-ն են վերցնում, և այս խնդրի ուղղությամբ «կես քայլ առաջ չեք եկել, նույնիսկ կես քայլ ետ եք գնացել»: Օրենքները մինչև վերջին ստորակետը մշակված են ու «տաշած», բայց եթե մի մասը հարկերը չի մուծելու, ապա թող բոլորը չմուծեն:
Բագրատյանը հայտնեց, որ ՀԱԿ-ը դեմ է քվեարկելու 2013-ի բյուջեին:
