ՀԺԿ նախկին անդամ, ոստիկանության կողմից 2004 թվականին խոշտանգված Գրիշա Վիրաբյանի գործը վերաբացվել է: Այն բանից հետո, ինչ Եվրադատարանը Վիրաբյանի օգտին որոշում կայացրեց, և Հայաստանի Հանրապետությունը ստիպված եղավ փոխհատուցել ընդդիմադիր գործչին, Վիրաբյանը նորից դիմեց Հայաստանի արդարադատությանը՝ մեղավորներին պատժելու պահանջով:
Հիշեցնենք, որ քննչական մարմինը դեռ 2004 թվականին հրաժարվեց գործ հարուցել Վիրաբյանին խոշտանգելու մեղադրանքով՝ համարելով, որ ոստիկանական բաժանմունքում նրան ծեծի չեն ենթարկել: Աչք փակվեց անգամ այն հանգամանքի վրա, որ Վիրաբյանը օրեր շարունակ անցկացրել է հիվանդանոցում, դաժան ծեծի հետևանքով վիրահատվել: Ավելին՝ Գրիշա Վիրաբյանին վիրահատող բժիշկների հավաստմամբ՝ եթե վիրահատությունը փոքր-ինչ ուշանար, ապա նրա կյանքը հնարավոր չէր լինի փրկել:
«Առաջին լրատվական»-ի հետ զրույցում այժմ Բելգիայում բնակվող Գրիշա Վիրաբյանը նշեց, որ իր նպատակն է հասնել արդարության սեփական երկրում և պատժել բոլոր այն մարդկանց, ովքեր իրեն ծեծի են ենթարկել և առողջությանը վնաս հասցրել:
Հիշեցնենք, որ դեպքի հետ անմիջական առնչություն ունի Երևանի ներկայիս ոստիկանապետ Աշոտ Կարապետյանը: Վիրաբյանին երկաթե իրերով հարվածողներից մեկն էլ հենց Կարապետյանն է եղել:
«Պահանջս այն է, որ իրավական սահմաններում քրեական գործ բացվի, վերանայվի: Հիվանդանոցի արձանագրությունը կա, գլխավոր բժշկի, շտապօգնության բժշկի արձանագրությունները կան, որ ինձ ոստիկանությունից մահամերձ են տարել հիվանդանոց, ջարդվածքներ, վնասվածքներ եմ ունեցել: Ես ցուցմունքներում ասել եմ, որ հանձինս Աշոտ Կարապետյանի՝ ինձ խոշտանգել են: Ամեն մարդ իր արածի պատասխանը պետք է տա, իրենք ասում են՝ չի եղել այդպիսի բան, բայց արդյունքում ես մահամերձ հայտնվեցի հիվանդանոցում»:
Գրիշա Վիրաբյանն ընդգծեց նաև, որ պահանջելու է, որ գործին առնչվող այն մարդիկ, ովքեր հիմա պաշտոններ ունեն՝ ժամանակավորապես դադարեցնեն իրենց լիազորությունները՝ օբյեկտիվ քննությանը չխանգարելու համար. «Առաջին հերթին Աշոտ Կարապետյանը պետք է իր լիազորությունները դադարեցնի, նա բարձր պաշտոնի է, կարող է չարաշահել իր պաշտոնը և գործն ուրիշ ուղղությամբ տանել»,- ասաց մեր զրուցակիցը:
Նա վստահ է, որ այդ գործին քաղաքական երանգ է տրվել՝ ոստիկանությունը և դատախազությունը քաղաքական պատվեր են կատարել, որի հեղինակը հենց Հովիկ Աբրահամյանն է. «Այդ գործի քննության ընթացքում պահանջ եմ դնելու, որ Հովիկ Աբրահամյանին զրկեն եվրոպական երկրներ գալուց, նրա և Ռոբերտ Քոչարյանի միջոցով է այդ ամենը կատարվել։ Ես ներկայացնելու եմ այդ պահանջը, ներկայացնելու եմ ամենը, և նրանք պատժվելու են: Դիմելու եմ Եվրամիությանը նրան շենգեն վիզայից զրկելու համար»:
Գրիշա Վիրաբյանի փաստաբանը՝ Արա Ղազարյանը, «Առաջին լրատվական»-ի հետ զրույցում ասաց, որ սա նախնական հաղթանակ է, և հույս հայտնեց, որ քննությունն արդար ընթացք կունենա. «Նրանք 2004 թվականին գտել են, որ հանցագործություն չկա, և գործը փակվել է: Բայց քննությունը եղել է անարդյունավետ, պաշտպանության միջոց չի աշխատել: Գրիշան դիմել է Վճռաբեկ դատարան՝ Եվրոպական դատարանի վճռի հիման վրա:
Վճռաբեկ դատարանը դիմումն ընդունել է, բեկանել նախկին որոշումը և հայտարարել, որ գործը վերաբացված է: Վճռաբեկը գործն ուղարկել է առաջին ատյանի դատարան: Առաջին ատյանը որոշեց, որ դատախազը հաշվի չի առել այն հանգամանքները, որ Եվրադատարանը հաշվի էր առել: Այսինքն՝ այդ հանգամանքները պետք է նորից քններ և որոշեր քրական գործ պե՞տք է հարուցեր, թե՞ ոչ:
Գրիշան առաջին ատյանում շահեց, դատախազի կողմից վերաքննիչ բողոք բերվեց ՝ երկու հիմքով, որից մեկը վերաբերում է նրան, որ առաջին ատյանի դատարանը իրավունք չուներ բեկանելու դատախազի որշումը, այլ պետք է հրահանգեր, որ դատախազը բեկաներ: Այդ իմաստով վերաքննիչը բավարարեց, բայց մնացած մասով ուժի մեջ թողեց, այսինքն՝ հիմնական մասով Գրիշան գործը շահել է և հրահանգվել է նախաքննությունը վերաբացել»:
Փաստաբանը նշեց, որ քննությունը կկատարվի այն տեսքով, որով հրահանգել է Եվրադատարանը. «Իսկ Եվրադատարանը նշել է, որ քննության ժամանակ ուշադրություն չի դարձվել Գրիշա Վիրաբյանի այն պնդումներին, որ նրան ծեծի են ենթարկել իր ընդդիմադիր գործունեության համար»:
Ինչ վերաբերում է Աշոտ Կարապետյանի լիազորությունները ժամանակավորապես դադարեցնելու՝ Վիրաբյանի պնդումներին, Արա Ղազարյանն ասաց. «Դատավարական իմաստով նման ընթացակարգ չկա, հենց այդ նպատակով էլ ստեղծվել է ՀՔԾ-ն, որովհետև ժամանակին ոստիկանության կողմից բռնության կիրառման գործերը քննում էր ոստիկանությունը, հետո եվրոպական կառույցներն ասացին, որ դա ճիշտ չէ, նա չի կարող անկողմնակալ լինել, և պետք է առանձին մարմին ստեղծվի դրա համար:
Հիմա ես չգիտեմ՝ Աշոտ Կարապետյանը որքանով կկարողանա ազդել ՀՔԾ-ի վրա, բայց բոլոր դեպքերում վարույթում Վիրաբյանի հայտարարությունը կլինի՝ առ այն, որ հենց այդ անձն է նրան խոշտանգողը»,- եզրափակեց Վիրաբյանի փաստաբանը:
