ԱՄՆ վարձույթի վարկանիշային աղյուսակում առաջին տեղը զբաղեցնում է վամպիրական սագայի վերջին՝ «Մթնշաղ: Սագա: Լուսաբաց. մաս երկրորդ» ֆիլմը, որը հանգստյան օրերին վաստակել է 17,4 մլն դոլար:
Այս պահին ֆիլմը հավաքել է 702,4 մլն դոլար ու բոլոր հնարավորություններն ունի՝ դառնալու ամենաեկամտաբեր ժապավենը՝ առաջ անցնելով առաջին մասից` «Լուսաբաց»-ից (հասույթն ամբողջ աշխարհում կազմել էր 712,2 մլն դոլար) ու «Նորալուսնից» (709,8 մլն դոլար), հաղորդում է Gazeta.ru-ն:
Սակայն երկրորդ «Լուսաբաց»-ին նման հաջողություն է սպասում միայն համաշխարհային վարձույթում. եթե հաշվի առնենք ամերիկյան հասույթը, ապա անգամ առաջին «Լուսաբացի» արդյունքին (281,2 մլն դոլար) ֆիլմի վերջին սերիան դժվար հասնի. առաջին երկու տեղերը ներկայում զբաղեցնում են «Նորալուսինը» (296,6 մլն դոլար) և «Խավարումը» (300,5 մլն դոլար):
«Մթնշաղից» շատ քիչ է հետ մնում գործակալ Ջեյմս Բոնդի մասին պատմող ««Սքայֆոլ» կոորդինատները», որը հանգստյան օրերին հավաքել է 17 մլն դոլար: 4 շաբաթվա վարձույթում «Սքայֆոլը» հավաքել է ամբողջ աշխարհում 869 մլն դոլար:
