Նարցիսիզմը սոցցանցերի, օրինակ՝ Facebook-ի կողմնակի ազդեցություն է՝ կարծում են հոգեբանները: Այնտեղ արված է ամեն ինչ, որպեսզի մարդը մշտապես զբաղվի ինքնասիրահարվածությամբ (հավելի իր լուսանկարները, թարմացնի կարգավիճակը): Օրինակ՝ պրոֆիլի լուսանկարը հնարավորություն է տալիս առավելագույն ուշադրություն սևեռել սեփական անձի վրա՝ հայտնում է Meddaily-ն:
Հյուսիսային Ֆլորիդայի համալսարանից
Թրեյսի Էլոուվեյի հետազոտությունը ցույց է տվել, որ առցանց մարդու վարքը նույնությամբ ցույց է տվել նրա ինքնասիրահարվածության աստիճանը: Հետաքրքիր է, որ տղամարդկանց դեպքում նարցիսիզմի միակ բնորոշիչը եղել է պրոֆիլի լուսանկարի գնահատականը, իսկ կանանց դեպքում գործել են և լուսանկարների գնահատականները, և կարգավիճակների փոփոխության հաճախականությունը:
Փորձին մասնակցել է 18-50 տարեկան ավելի քան 400 կամավոր: Մարդիկ սոցցանցից օգտվել են օրական միջինը 2 ժամ: Նրանց ընկերների ցանկում մոտ 500 մարդ է եղել: Չնայած նարցիսիզմը բնորոշ է եղել երկու սեռերին էլ՝ կանայք ավելի հաճախ են իրենց լուսանկարը գնահատել որպես «ֆիզիկապես գրավիչ», «գլամուրային» և «ընտիր»: Կանայք նաև ավելի հաճախ են փոխել պրոֆիլի լուսանկարը (2 ամիսը մեկ անգամ, իսկ տղամարդիկ՝ 3 ամիսը մեկ անգամ):
