1923թ. այս օրը Երևանում բացվեց Հայաստանի պետական կոնսերվատորիան:
Ի սկզբանե, 1921թ. հիմնադրվել էր Ռոմանոս Մելիքյանի կողմից՝ որպես երաժշտական ստուդիա, ապա երկու տարի անց վերափոխվել բարձրագույն երաժշտական ուսումնական հաստատության: Կոնսերվատորիայի առաջին հիմնադիրն էր բազմակողմանի զարգացած երաժիշտ-կոմպոզիտոր և երգչախմբային դիրիժոր, Մոսկվայի կոնսերվատորիայի շրջանավարտ Ռոմանոս Մելիքյանը:
Կոնսերվատորիայի առաջին դասախոսներն էին դաշնակահարներ Ա. Մնացականյանը, Ի. Մադաթյանը, Ե. Խոսրովյանը, ջութակահարներ Ա. Գաբրիելյանը, Դ. Սողոմանյանը, Գ. Միրզա-Ավագյանը, ինչպես նաև Ա. Կոտլյարևսկին և Ա. Այվազյանը:
Ռեկտորի պաշտոնում Ռ. Մելիքյանի արմատավորած ավանդույթները շարունակել են նաև հաջորդած ղեկավարները:
Կոնսերվատորիան ունի ուսանողական սիմֆոնիկ, կամերային, ժողովրդական գործիքների նվագախմբեր և ժողովրդական երգչախումբ, կամերային խմբեր` եռյակ, քառյակ, փողային վեցյակ և այլն:
Կոնսերվատորիայի բաժիններում սովորում են հազարից ավելի ուսանողներ, 120-ը` արտերկրից:
Կոնսերվատորիայի հայտնի սաների թվում են եղել Առնո Բաբաջանյանը, Էդվարդ Միրզոյանը, Ալեքսանդր Հարությունյանը, Անահիտ Ցիցիկյանը, Տիգրան Մանսուրյանը, Վաչե Շարաֆյանը և այլք:
