Եթե որևէ երկրում տնտեսական վիճակը վատանում է, կառավարությունը փոխվում է: Երեկ «Հայկական ժամանակ»-ի թղթակցի հարցերին ի պատասխան` նման «անպարկեշտ» պնդում է արել Եվրոպայի ժողովրդական կուսակցության փոխնախագահ Յացեկ Սարյուզ-Վոլսկին: Սա «անպարկեշտ» է, որովհետև ԵԺԿ անդամ Հայաստանի հանրապետական կուսակցության ձևավորած կառավարության օրոք Հայաստանի տնտեսական վիճակը վատթարացել է (մեղմ ասած), մինչդեռ կառավարությունը ոչ միայն չփոխվեց ամիսներ առաջ կայացած Աժ ընտրությունների արդյունքներով, այլև ՀՀԿ-ն մտադիր է թեկնածու առաջադրել առաջիկա նախագահական ընտրություններում և պնդում է, որ հենց նա է միակ հաղթող թեկնածուն: Սա, ինչպես «ՀԺ» թղթակցին փոխանցել է ԵԺԿ փոխնախագահը, իրենք եվրոպացիները, չեն կարող հասկանալ: Թերթը ներկայացնում է Յացեկ Սարյուզ-Վոլսկու հետ «ՀԺ» թղթակցի զրույցը, որը տեղի է ունեցել երեկ` Աժ-ում:
– Պարոն Վոլսկի, եվրոպական երկրներից մեկ օրինակ կարո՞ղ եք բերել որտեղ տնտեսական ցուցանիշները գահավիժում են, աղքատության ու արտագաղթի ցուցանիշները` մեծանում, իսկ իշխանությունները շարունակում են վերընտրվել:
– Մեծամասնության դեպքերում այդպիսի բան չկա:
– Թեկուզ մեկ օրինակ:
– Մեծ մասամբ էդպես չի լինում: Եթե տնտեսական իրավիճակը վատանում է, կառավարությունը փոխվում է:
– Ուղղակի Հայաստանում դա կայացած իրողություն է` շնորհիվ ՀՀԿ-ի, որին ԵԺԿ-ն իր շարքերն է ընդունել:
– Դա Հայաստանի ժողովրդավարության գաղտնիքն է, որը միայն Հայաստանը գիտի, մենք չգիտենք: Փաստորեն, երևի հայկական հասարակության համար տնտեսական վիճակը ֆակտոր չէ իշխանությունների ընտրության ժամանակ:
– Չե՞ք կարծում, որ իր երկրում կասկածելի ժողովրդականություն վայելող քաղաքական ուժին` ՀՀԿ-ին աջակցելով, նպաստում եք, որ հայ հանրության մոտ նոյնքան կասկածելի վերաբերմունք ձևավորվի դեպի եվրոպական արժեքները:
– Իրականում մենք չենք օժանդակում ինչ-որ կոնկրետ կուսակցության: Հայաստանում մենք ունենք 3 գործընկեր կուսակցություն, որոնք ԵԺԿ անդամներ են, և գլխավոր գաղափարն այն է, որ մեր արժեքային խնդիրների տեսլականի հետ իրենց մոտեցումները համընկնում են: Սա զուտ համագործակցություն է, բայց ոչ` օժանդակում:
Թե որ հարցում է ՀՀԿ-ի մոտեցումը համընկնում ԵԺԿ-ի արժեքային տեսլականին, դժվար է ասել: Փաստ է, սակայն, որ ժողովրդավարության հարցում ԵԺԿ տեսլականներն ու ՀՀԿ մոտեցումները չեն համընկնում, որովհետև ՀՀ-ի ժողովրդավարությունը գահավիժող տնտեսական ցուցանիշների պայմաններում վերընտրվող ՀՀԿ-ի պատճառով, մի գաղտնիք ունի, որը ԵԺԿ-ին հայտնի չէ:
Երեկ Երևանում կայացել է ԵԺԿ Արևելյան գործընկերության առաջնորդների 2-րդ գագաթնաժողովը: Մինչ այդ ՀՀ Աժ-ում հյուրընկալվել էր ԵԺԿ պատվիրակությունը` «Խորհրդարանական ուղղվածությունը և համագործակցությունը քաղաքացիական հասարակության հետ հանուն եվրոպական ինտեգրման» ֆորումին մասնակցելու նպատակով:
