«Մենք սա չենք համարում ՕԵԿ-ի հանրահավաքը: Մենք սա համարում ենք հանրահավաք, խնդիր, որը հուզում է ողջ հայ ժողովրդին»,- այսօր լրագրողների հետ հանդիպման ժամանակ անդրադառնալով հուլիսի 18-ի հանրահավաքին՝ հայտարարեց ՕԵԿ առաջնորդ Արթուր Բաղդասարյանը՝ հավելելով, որ իրենք հրապարակային կոչով դիմել են բոլոր քաղաքական ուժերին, հասարակական, քաղաքացիական միավորումներին՝ միանալ իրենց հանրահավաքի օրը:
«Եվ թե ով կմիանա, ինչ ֆորմատով՝ նրանց իրավունքն է: Միակ բանը, որ կարող եմ ասել, այն է, որ սա կուսակցական հանրահավաք չէ, և ես համոզված եմ, որ մենք ունենալու ենք փայլուն հանրահավաք, որտեղ պետք է բարձրաձայնենք մեր ժողովրդին հուզող բոլոր խնդիրները»,- հավելեց Բաղդասարյանը:
Հարցին ի պատասխան, թե հնարավո՞ր է հանրահավաքի ժամանակ բարձրացվի Սերժ Սաևգսյանի հրաժարականի հարցը, ՕԵԿ առաջնորդը նկատեց, որ սա սոցիալական բնույթի հանրահավաք է լինելու: «Ինչ խոսք, հանրահավաքում կհնչեն նաև քաղաքական բնույթի հայտարարություններ, առաջարկվելու է ապագայի ճանապարհի ՕԵԿ-ի քարտեզը, իսկ ինչ վերաբերում է Սերժ Սարգսյանի հրաժարականի պահանջին, ապա Սերժ Սարգսյանը ինքն է հայտարարել ակտիվ քաղաքականությունից հեռանալու մասին, հայտարարել է նաև վարչապետի պաշտոնում չառաջադրվելու հավակնությունների մասին: Ընդամենը 2.5 տարի հետո, ուզենք թե չուզենք, երկրում մեկնարկելու են խորհրդարանական և նախագահական ընտրություններ»,- ասաց Բաղդասարյանը՝ հավելելով, որ ամեն դեպքում ինքը չի բացառում արտահերթ գոնե խորհրդարանական ընտրությունների հնարավորությունը:
Արթուր Բաղդասարյանը, անդրադառնալով քառյակին, քառյակի 12 կետերին, քառյակը հնգյակ դառնալու հնարավորությանը, նշեց, որ քառյակը, հնգյակը ձևաչափեր են ընդամենը: Իրենք, այսպես թե այնպես, ԱԺ-ում համագործակցում են քառյակի անդամ կուսակցությունների հետ: «Բացի դրանից՝ նման առաջարկ քառյակի կողմից մեզ չի արվել, մենք նման հարց չենք քննարկել կուսակցությունում»,-ասաց Բաղդասարյանը:
Լուսանկարը` PAN Photo-ի
