Երկուշաբթի Պրահայում սկսվել են առևտրատնտեսական հարցերի շուրըջ ռուս-վրացական բանակցությունները: Սա կողմերի առաջին հանդիպումն է Վրաստանի կողմից ԵՄ-ի հետ ասոցացման մասին համաձայնագրի ստորագրումից հետո: Փորձագիտական խմբերը կքննարկեն Մոսկվայի և Թբիլիսիի ապագա առևտրային հարաբերությունները՝ հաշվի առնելով այդ փաստաթուղթը, ինչպես նաև սեպտեմբերի 1-ից ուժի մեջ մտնող Եվրասիական տնտեսական միությունում առևտրի կանոնները: Բանակցությունները կավարտվեն Ռուսաստանի հետ հարաբերությունների հարցերով Վրաստանի վարչապետի հատուկ ներկայացուցիչ Զուրաբ Աբաշիձեի և Ռուսաստանի փոխարտգործնախարար Գրիգորի Կարասինի հանդիպմամբ: Այս մասին հայտնում է «Նեզավիսիմայա գազետան»:
Սկզբունքորեն Վրաստանը, որն այս օրերին խորհրդակցություններ է անցկացրել Ղազախստանի հետ, արդեն պետք է ծանոթ լինի սպասվող փոփոխություններին, և, դատելով պաշտոնական աղբյուրների հաղորդագրություններից, այդ ոլորտում որոշակի պայմանավորածությունների է հասել Աստանայի հետ:
Սակայն Մոսկվայի հետ հարաբերություններն այլ են՝ հաշվի առնելով հայտնի քաղաքական խնդիրները, ինչպես նաև այն, որ էմբարգոյի չեղյալ հայտարարումից հետո Ռուսաստանը Վրաստանի գյուղատնտեսական ապրանքների ներկրման ծավալով առաջին տեղում է: Նշվում է, որ 2014-ին Ռուսաստանին է բաժին ընկել վրացական գինու արտահանման 70 տոկոսը:
Հաշվի առնելով նման ցուցանիշները՝ օրինաչափ է Վրաստանի էկոնոմիկայի նախարար Գեորգի Կվիրիկաշվիլիի հայտարարոթյունը, որ Թբիլիսին կներդնի առավելագույն ջանքեր՝ Ռուսաստանի հետ ներկայիս ռեժիմի և առևտրի մակարդակի պահպանման համար:
Նրա խոսքով՝ Թբիլիսին Մոսկվայից այդ ոլորտում գաղտնիքներ չունի: Նա հույս է հայտնել, որ կհաջողվի առևտրային հարաբերությունները պահպանել ներկա մակարդակի վրա: «Կարծում եմ՝ դա բխում է նաև Ռուսաստանի շահերից, և մենք հույս ունենք, որ մեզ կհաջողվի կատարել հանձնարարությունը»,- ասել է նախարարը:
Միևնույն ժամանակ Թբիլիսիում մտավախություն ունեն, որ բանակցությունների վրա բացասական ազդեցություն կարող է ունենալ Մարդու իրավունքների ստարսբուրգյան դատարանի վճիռը, որն օրերս պարտավորեցրել էր Ռուսաստանին փոխհատուցում տրամադրել վրացիներին, ովքեր տուժել էին 2006-ին Ռուսաստանից արտաքսման հետևանքով: