Ռուսական Regnum լրատվական գործակալության փոխանցմամբ`այն բանից մի քանի ժամ անց, ինչ Մեքսիկայում ստեղծվեց Մեխիկոյում Ադրբեջանի նախկին նախագահ Հեյդար Ալիևի հուշարձանի գտնվելու նպատակահարմարության դիտարկման հանձնաժողով, Ադրբեջանի կառավարությունը զգուշացրել է, որ հուշարձանի փլուզման որոշման կայացման դեպքում կխզի Մեքսիկայի հետ իր դիվանագիտական հարաբերությունները:
Մեքսիկայում Ադրբեջանի դեսպան Իլգար Մուխտարովը La Razón թերթին հայտարարել է, որ այդպիսի քայլը «կվնասի» Մեքսիկային, կփակվի Մեքսիկայում Ադրբեջանի դեսպանատունը, Բաքուն կխզի դիվանագիտական հարաբերությունները և չեղյալ կհայտարարի 4 միլիարդ դոլարի ներդրումները: Նա հավելել է, որ հուշարձանի ապամոնտաժումն «ամոթալի» կլինի մեքսիկացիների համար:
Դեսպանի խոսքերով՝ հուշարձանի գտնվելու նպատակահարմարության հանձնաժողովի կազմը հայտարարելուց հետո ադրբեջանական կողմը հարցի դրական լուծման չի սպասում, քանի որ հանձնաժողովի անդամների մի մասն ի սկզբանե դեմ է եղել Հեյդար Ալիևի հուշարձանի կանգնեցմանը:
Հիշեցնենք, որ Հեյդար Ալիևի հուշարձանը Մեխիկոյի ադրբեջանա-մեքսիկական բարեկամության զբոսայգում կանգնեցվել է օգոստոսի 22-ին:
