Ռուսական «Վզգլյադ» թերթի փոխանցմամբ՝ «Վրացական երազանք» կուսակցության պատգամավոր Վալերի Գելաշվիլին Վրաստանի Գլխավոր դատախազությունից պահանջել է վերականգնել 6 տարի առաջ իրեն ծեծի ենթարկելու գործով հետաքննությունը և տվյալ գործով հարցաքննել նախագահ Միխեիլ Սաակաշվիլիին:
Տվյալ միջադեպը գրանցվել էր այն բանից հետո, ինչ Վալերի Գելաշվիլին, ով այն ժամանակ նույնպես պատգամավոր էր, հրաժարվել էր իր մասնավոր սեփականությունը զիջել նախագահական նստավայրի կառուցման համար և մամուլում կշտամբել էր Սաակաշվիլիի շրջապատին:
Դրանից հետո նրան դաժան ծեծի էին ենթարկել, և նա ստիպված է եղել բուժվելու նպատակով մեկնել արտերկիր, սակայն հետաքննությունն ավարտվել էր անարդյունք: Այժմ պատգամավորը պնդում է, որ Սաակաշվիլին պետք է տվյալ գործով հայտնվի բանտում, քանի որ իր վրա կատարված հարձակումը պլանավորվել է հենց նրա աշխատասենյակում: Պատգամավորի խոսքերով՝ դրա պլանավորմանը մասնակցել է նաև տվյալ ժամանակ ՆԳՆ նախարար Վանո Մերաբիշվիլին:
Գելաշվիլին ներկայումս պատրաստ է ցուցմունքներ տալ նրանց դեմ: Սաակաշվիլիին հարցաքննության կանչելու համար անհրաժեշտ է ստանալ խորհրդարանի սահմանադրական մեծամասնության աջակցությունը՝ 150-ից 100-ը: Մինչդեռ «Վրացական երազանք» դաշինքը խորհրդարնում ունի միայն 85 մանդատ:
