«Լևոն Տեր-Պետրոսյանը կլռի այնքան ժամանակ, որքան հարկ համարի, որևէ օրենքի խախտում չկա»,- «Արմնյուզ« հեռուստաընկերության «Բանաձև» հաղորդման եթերում ասել է ՀՀՇ վարչության նախագահ Արամ Մանուկյանը և հավելել, որ իրենք դիրքավորվում են. «Բացի Սերժ Սարգսյանից, մյուսները դեռ հստակ որոշում չունեն»:
Ըստ Արամ Մանուկյանի՝ այս պահին ընդդիմության կողմից խոսքը ոչ թե նախագահի թեկնածուի, այլև խնդիրների մասին է: ՀՀՇ վարչության նախագահը Հայաստանի առջև ծառացած մի շարք խնդիրներ է նշում, որոնք անհրաժեշտ լուծման կարիք ունեն. «Առաջինը՝ արտաքին քաղաքականությունն է, որտեղ Հայաստանն ավելի շատ հակառակորդներ ունի, քան համակիրներ»: Մյուս խնդիրները, ըստ Արամ Մանուկյանի, ներքին են՝ սոցիալական առումով նահանջ ենք ապրում, բյուջեն խնդիր չի լուծում, կոռուպցիան համատարած է, կա արտագաղթ: Ըստ այդմ՝ ցանկացածը, որ հայտ է ներայացնում, պետք է ասի, որ խնդիրների լուծման տարբերակ ունի:
«Համարձակ փոփոխությունների և լուծումների կարիք ունենք: Եթե արտագաղթն այսպես շարունակվի, այլևս մի հինգ տարի հետո դրա մասին չենք խոսի: Պետք է լուծում գտնել, միավորվել: Բաժան-բաժան ծրագրերով խնդիր չի լուծվի»,– ասել է Մանուկյանը: Միաժամանակ, ըստ նրա, հնարավոր չէ Հայաստանում հարց լուծել ընտրություններով. «Եթե ուզում ես հասարակությանը հույս տաս, որ կարելի է ընտրություններով այս խնդիրները լուծել, հնարավորինս պետք է քաղաքական դաշտը բևեռացվի, որպեսզի լինի նաև ըդդիմության միասնական թեկնածու: Անձի խնդիր չէ, այլ խնդիրների համատեղ լուծում»:
Արամ Մանուկյանի խոսքերով՝ եթե բոլոր ուժերն այս պահին խոսեն թեկնածուի մասին, քննարկումները կանգ կառնեն: ՀԱԿ-ում, ըստ նրա, ամեն օր բախումներ են. մի մասը դեմ է ԲՀԿ-ի հետ համագործակցելուն, մի մասը պահանջում է միայն Լևոն Տեր-Պետրոսյանին, բայց անկախ ամեն ինչից, բոլորը ենթարկվում են որոշումներին, որոնք կայացվում են միասին:
