Պետական եկամուտների կոմիտեն հույս ունի, որ նոյեմբեր-դեկտեմբերի հարկային հավաքագրումներն ամբողջությամբ կիրականացնեն և տարին ըստ ծրագրվածի կփակեն: Ինչպես այսօր լրագրողներին հայտնեց ՊԵԿ փոխնախագահ Արմեն Ալավերդյանը, ծրագրային ցուցանիշը դեկտեմբերի համար ավելի քան 85 մլրդ դրամ է, տարեկանը 875.4 մլրդ էր:
«Այսինքն` 2012-ի համար նախատեսված լրացուցիչ 101 մլրդ դրամ հարկերի մեծ մասն անցած ամիսներին ըստ էության կատարվել է: Շատ դժվար է, բայց աշխատում ենք»,- ասաց Ա. Ալավերդյանը:
Ի պատասխան «Առաջին լրատվական»-ի դիտարկմանը՝ լուրեր են պտտվում, որ, այնուամենայնիվ, խնդիրներ կան հարկային եկամուտները հավաքագրելու հետ կապված և ճնշումներ են գործադրվում տնտեսվարողների վրա, Ա. Ալավերդյանը նախ հետաքրքրվեց, թե որտեղի՞ց են այդ լուրերը, և հավելեց, թե ինքը ստացել է երեկվա մուտքերը, բայց նման տեղեկատվության չի տիրապետում: Մեր ճշտմանը՝ այսինքն` ճնշումներ չկա՞ն, ՊԵԿ փոխնախագահը հայտարարեց. «Տնտեսվարողները, ովքեր հարկային պարտավորությունները չեն կատարում, ենթարկվում են ճնշումների, հենց այսօր էլ ենթարկվում են: Մենք ունենք բազմաթիվ տնտեսվարող սուբյեկտներ, ովքեր անցած տարվա նկատմամբ ոչ թե աճ են ապահովել, այլ շրջանառությունների նվազում, նաև` խախտումների հետևանքով: Հարյուր-հազարավոր են նրանք, որոնք ունեն նաև խախտումներ: Եվ մենք մեր աշխատանքի հիմնական թիրախը երբ ասում ենք ռիսկային, նկատի ունենք նաև այն կազմակերպությունները, որոնք աճ չեն ապահովում: Հսկողության հետևանքով խախտումներ շատ են արձանագրվում: Այո՛, երբ հսկում ենք կոնկրետ ոլորտներ, խախտումները շատ են»:
