ԱԺ ՀՀԿ խմբակցության պատգամավոր Արփինե Հովհաննիսյանը կարծում է, որ նպատակային սոցիալական վճարի ներդրումը կարևոր ու գնահատելի քայլ էր: «Առաջին լրատվական»-ի հետ զրույցում Հովհաննիսյանն ասաց, որ պետք է կարողանալ օբյեկտիվորեն գնահատել, թե ինչ քայլ կատարեց այն՝ մեծ բողոքի ալիք բարձրացրած կուտակային կենսաթոշակների քննարկումներից մինչև այս նախագծի քննարկումները:
«Եթե, իհարկե, մենք ականջալուր ենք լինում ընդդիմության ներկայացուցիչների քննարկումներին, թվում է՝ ոչինչ չի փոխվել, և մենք ըստ էության նույն բանն ենք քննարկում, իրականում, սակայն, կան բավականին շատ փոփոխություններ. այն հարցադրումներից, որ անընդհատ հնչում էին հասարակության մեջ, շատերը դուրս են գալիս»,- ասաց նա:
Հովհաննիսյանը նշեց, որ սոցվճարի նախ՝ պետական հատվածում ներդրումն արդարացված է. պետությունն ապահովում է որոշակի աշխատավարձ, սոցիալական երաշխիքներ, շատ արդարացի է և իրավաչափ, որ պետությունն իրեն վերապահում է նաև իրավունք՝ բարձրացնելով աշխատավարձերը, նրանց երաշխավորված աշխատավարձին չդիպչելով, մի բան էլ ավելացնելով՝ նպատակային սոցիալական վճար պահել, որը նաև հենց սոցիալական երաշխիքների ապահովման համատեքստում է:
Հարցին՝ արդյոք մինչ պարտադրումը կամավորության սկզբունքով միացե՞լ էր կուտակային համակարգին, ՀՀԿ-ական պատգամավորը նշեց, որ չի մասնակցել, որի պատճառն իրազեկվածության պակասն էր: «Անկեղծ ասեմ՝ երբ համակարգում ես դեռ նոր էի քայլեր կատարում, երեք-չորս տարվա աշխատող էի, էդ ժամանակ նաև իրազեկվածության պակաս կար: Անկեղծ կասեմ՝ ամենևին կապ չունի, որ ես Հանրապետական կուսակցության ներկայացուցիչ եմ, ուղղակի իրազեկվածության պակաս կար, ու քննարկման առարկա էլ չի դարձել՝ մասնակցե՞լ, թե՞ ոչ»,- ասաց նա՝ հավելելով, որ իրազեկ լինելու դեպքում այլ կլիներ:
