Իսրայելը փոխում է քաղաքացիական ինքնաթիռների երթուղու ուղղությունը Թել Ավիվի մոտակայքում գտնվող «Բեն-Գուրիոն» օդանավակայանի շրջանում` ՀԱՄԱՍ-ի հրթիռներից սպասվող վտանգի պատճառով: Այս մասին, ինչպես հաղորդում է Interfax-ը, այսօր հայտնել է Իսրայելի քաղաքացիական ավիացիայի ներկայացուցիչը:
Պաշտոնյան նշել է, որ ինքնաթիռների նոր ուղղությունը մշակվել է այս շաբաթ օրը, երբ օդանավակայանի շրջանում տեղադրվել են Իսրայելի հակահրթիռային պաշտպանության համակարգեր, ինչը նույնպես կարող է հավելյալ խնդիրներ հարուցել ինքնաթիռների վայրէջքի և վերելքի ժամանակ, քանի որ ՀՀՊ համակարգերը կարող են օգտագործվել ՀԱՄԱՍ-ի հրթիռների դեմ:
Միաժամանակ նա ընդգծել է, որ «ուղղությունը փոխելու հետևանքով քաղաքացիական ինքնաթիռներին վտանգ չի սպառնում»:
Իսրայելի պաշտպանության բանակի տվյալներով՝ վերջին 5 օրում Իսրայելի տարածքի վրա արձակվել է 848 հրթիռ, որից 546-ը ընկել են գետնին, 302-ը բռնվել են ՀՀՊ-ի կողմից:
Ներկայում Գազայի հատվածում զոհերի թիվը խաղաղ բնակչության շրջանում գերազանցել է 80-ը, որոնց թվում շատ են կանայք ու երեխաները:
