Ինչպես հայտնի է՝ նորանշանակ վարչապետ Հովիկ Աբրահամյանը սպառնացել է բացահայտել ձեռնարկատիրությամբ զբաղվող նախարարներին ու պաշտոնյաներին և նրանց հեռացնել կառավարությունից, սակայն մինչ այժմ որևէ մեկին չի գտել:
«Առաջին լրատվական»-ն այսօր Սարդարապատի հուշահամալիրում ֆինանսների նորանշանակ նախարար Գագիկ Խաչատրյանից հետաքրքրվեց, թե մտավախություն չունի՞, որ վարչապետ Հովիկ Աբրահամյանն ի վերջո կարող է հայտնաբերել բիզնեսներ ունեցող նախարարների:
«Շատ հեշտ է գտնելը, եթե դրանք իրականում կան: Եթե չկան, դժվար կլինի գտնելը»,- «Առաջին լրատվական»-ի հետ զրույցում ասաց Գագիկ Խաչատրյանը:
Մեր հարցին՝ իսկ Գագիկ Խաչատրյանն ինքը չունի՞ նման մտավախություն, որ վարչապետը կհայտնաբերի նաև իր բիզնեսները, ֆինանսների նախարարն այսպես պատասխանեց. «Իհարկե, չունեմ: Այդ թեման վաղուց փակված է. որ կարողանայիք, կգտնեիք: Ձեզ էլ եմ խորհուրդ տալիս, որ գտնեք»:
Մեր հակադարձմանը, թե մամուլում տեղեկություններ են շրջանառվում, որ մի շարք ընկերություններ կապվում են նրա անվան հետ (օրինակ՝ «Յուքոմ», «Ապեյրոն», «Մեգա ֆուդ», «Մեգասպորտ», «Երևան մոլ» և այլն), Խաչատրյանն ասաց. «Քանի՞ տարի կարելի է դրա մասին խոսել ու պատասխանել: Մենք գիտենք՝ շրջանառողներին էլ, նպատակն էլ: Մենք շատ հանգիստ ու ազատ ենք մեր գործողությունների մեջ, և դա մեզ ընդհանրապես հետաքրքիր չէ: Մեզ հետաքրքիր է ցանկացած բիզնեսի հարկային-մաքսային հետագիծը»:
Մեր հստակեցմանը, թե նա այդպիսով ուզում է ասել, որ ինքը որևէ բիզնեսում ներգրավվա՞ծ չէ, բաժնետեր է՞լ չէ, Գ. Խաչատրյանն ասաց. «Ոչ մի բիզնես չունեմ, ոչ մի բիզնեսում ներգրավված չեմ»:
Մեր հարցին՝ իսկ Հովիկ Աբրահամյանի և նրա ընտանիքին պատկանող բիզնեսների մասին գիտի՞, ֆինանսների նախարարն ասաց «Ես ընդհանրապես չեմ հետաքրքրվել: Հ. Աբրահամյանը պատասխանել է այդ հարցին: Եվ կարծում եմ, որ այդ հարցով պետք է դիմել իրեն»: