Լինելով ամենահին խորհրդատվական ընկերություններից մեկը ներքին շուկայում՝ «Ամերիա» ընկերությունը նախաձեռնել է ՀՀ տնտեսության զանազան ոլորտների լայնածավալ ուսումնասիրություններ՝ դրանց միջոցով տալով գնահատականներ և նախանշելով տնտեսության տարբեր ճյուղերի զարգացման միտումները: Նման ուսումնասիրություններից մեկը՝ «Սպառողների նախասիրությունները Երևանում», այսօր ներկայացվեց ընկերության աշխատակիցների կողմից:
Ինչպես նշեց «Ամերիա» ընկերության Զարգացման գծով տնօրեն, Կառավարման խորհրդատվական ծառայության ղեկավար Տիգրան Ջրբաշյանը, ուսումնասիրությունը կդյուրացնի բիզնեսմենների, ներդրողների, պետական կարգավորիչների և ֆինանսական ինստիտուտների աշխատանքը, որոնք, ծանոթանալով ուսումնասիրությանը, կփորձեն կողմնորոշվել և ճիշտ իրականացնել իրենց քաղաքականությունն ու իրենց զարգացման պլանները:
Ըստ Տ. Ջրբաշյանի՝ սա նաև ամենամրցակցային շուկաներից մեկի վերաբերյալ տեղեկություններ ստանալու հնարավորություն է տալիս: «Ուսումնասիրությունն այնպիսի զարգացող շուկայի մասին է, ինչպիսին ցանցային առևտուրն է, որն այսօր ամենազարգացողներից մեկն է: Հայաստանը միակ երկիրն է տարածաշրջանում, որտեղ վերջին ութ տարիների ընթացքում, չնայած համաշխարհային տնտեսական ճգնաժամին, այս շուկան կայուն աճ ունի և անկում չի ունեցել»,- նկատեց Տիգրան Ջրբաշյանը:
Մասնավորապես` անդրադառնալով վերլուծությանը՝ ասաց, որ նախ կատարվել է Հայաստանի մանրածախ առևտրի վերլուծություն, որը վերաբերում է արագ սպառման ապրանքների նկատմամբ սպառողների վարվելաձևին, վերաբերմունքին, իրենց նախասիրություններին, գնումների մեծությանը և այլն: Նրա որակմամբ՝ վերլուծությունը բավական մեծ է, պատասխանում է մի շարք հարցերի` սկսած նրանից, թե որտեղից են սպառողներն իրենց գնումները կատարում, վերջացրած նրանով, թե ինչ ցուցանիշներ են կարևորում իրենց գնումներն անելիս:
«Այն բնորոշում է ցանցային առևտրի հեռանկարները, տալիս պատասխաններ, թե որտեղ և ինչ ձևով են տեղավորված այդ ընկերությունները, մարդիկ ինչու են գնում այս կամ այն ցանցային առևտրի: Պատասխանները շատ են: Սա բավական մեծ վերլուծություն է, որը մենք առաջարկելու ենք շուկայում»,- նշեց «Ամերիա» ընկերության ներկայացուցիչը:
Ուսումնասիրության հիմնական ուղղություններն են՝ արագ սպառման ապրանքներ ձեռք բերող հիմնական հաճախորդները, առևտրի կետերի հիմնական տեսակները, սննդի մատուցման ծառայությունների սպառումը, սուպերմարկետների հաճախելիությունը, սուպերմարկետների գնահատումը, զեղչային, բոնուսային քարտերը, ընտրության վրա ազդող էական գործոնները, արագ սպառման ապրանքների վրա ծախսվող գումարը:
Այսօր Երևանի «Կոնգրես» հյուրանոցում ուսումնասիրության հիմնական արդյունքները ներկայացրեց «Ամերիա» ՓԲԸ Կառավարման խորհրդատվական ծառայության ղեկավարի տեղակալ Կարեն Մարտիրոսյանը:
Ցանկացողներն ամբողջական ուսումնասիրության արդյունքները կարող են ձեռք բերել «Ամերիա» ՓԲԸ-ից: Արժեքը՝ 490 հազար ՀՀ դրամ` ստանդարտ հաշվետվության համար:
