Չեխիայի Հանրապետության նախագահ Միլոշ Զեմանը երկրի բարձրագույն պարգև՝ Սպիտակ առյուծի շքանշան է շնորհել սըր Նիկոլաս Ուինթոնին, հաղորդում է news.ru–ն։ Այդ շքանշանով պարգևատրվում են արտասահմանյան քաղաքացիները՝ պետության առաջ ականավոր ծառայության համար։
1939 թվականին՝ Երկրորդ աշխահամարտի ամենասկզբին, բրիտանացին կազմակերպել է երեխաների զանգվածային էվակուացիա նացիստների գրաված Չեխոսլովակիայից Մեծ Բրիտանիա։ Ութ գնացքներ տեղափոխել են 669 երեխաների, որոնք հիմնականում հրեաներ էին, փրկելով նրանց համակենտրոնացման ճամբարներում ոչնչացումից։
Մայիսի 19-ին սըր Նիքոլաս Ուինթոնը նշել է իր 105-ամյակը։ Շնորհավորական նամակում Չեխիայի նախագահը նշել է նրա անշահախնդիր, անձնական քաջությունն ու համեստությունը և նրա կյանքը կոչել է իսկական հումանիզմի օրինակ։ Մ. Զեմանը նաև հաղորդել է նրան Չեխիայի բարձրագույն պարգևի շնորհման մասին և սըր Ուինթոնին հրավիրել է Պրահա՝ մասնակցելու պարգևի հանձնման հանդիսավոր արարողությանը։
