«Օրինաց Երկիր» խմբակցության քարտուղար Մհեր Շահգելդյանն այսօր «Առաջին լրատվական»-ին ասաց, որ ուսումնասիրել են կառավարության ծրագիրը, և առաջացել են շատ հարցեր.
«Կառավարության ծրագրում կան շատ ձևակերպումներ, մոտեցումներ, որոնք շատ ընդհանրական են: Օրինակ՝ նշված է, որ պետք է ապահովել ֆինանսների հասանելիությունը, ի՞նչ է սա նշանակում՝ տոկոսադրույքների պակասեցո՞ւմ, թե՞ ինչ: Կամ արտաքին քաղաքականության հետ կապված՝ առանձին նշված է, որ պետք է տնտեսության զարգացման ուղղությամբ լինի, բայց կետերի մեջ չկա՝ նշված տնտեսական դիվանագիտությունը պետք է ամրապնդվի՞, թե՞ ոչ…»:
Նա ընդգծեց, որ իրենք մասնակցելու են կառավարության ծրագրի քննարկումներին և ունեն բազմաթիվ հարցադրումներ․ «Դրանց հիման վրա մեր դիրքորոշումը կներկայացնենք»:
Հետաքրքրվեցինք, թե համակարծի՞ք է, որ սա օլիգարխների կառավարություն է։ Մհեր Շահգելդյանն ասաց․ «Ես չեմ ուզում նման ձևակերպումներ տալ, խոսքն անհատներին չի վերաբերում, այլ կառավարությանը՝ որպես ինտիտուտի: Իսկ որ Հայաստանում օլիգարխները շատ են՝ մենք դրա մասին խոսել ենք»:
Հարցրինք, թե հնարավո՞ր է՝ միանան քառյակի հանրահավաքներին․ «Մենք ասել ենք, որ մեր մոտեցումներով ու սկզբունքներով ենք առաջ գնալու. այնպես, ինչպես կծրագրենք, այնպես էլ կիրականացնենք: Եթե ուշադիր եք նայում, ապա կտեսնեք, որ կան բազմաթիվ դեպքեր, երբ քառյակի մեջ եղած կուսակցությունները տարբեր դիրքորոշումներ են որդեգրում, շատ հաճախ ոչ միայն այդ կարծիքներն իրար չեն համապատասխանում, այլև հակադրված են»:
Նա ընդգծեց, որ եթե կլինեն ծրագրեր, որ կհամապատասխանեն մեր ազգային անվտանգությանը, մեր պետության զարգացմանը՝ իրենք պատրաստ են համագործակցել բոլոր քաղաքական ուժերի հետ»։
Մանրամասները՝ տեսանյութում։
